Ich herman ymian ze den zeiten richter vnd wir der Rat mit sampt der gemain der Stat ze herczogen Newnburch - daz der beschayden man Vlreich der Schvzlinch von Pazzow vnd sein chonn vrow Leukart - ir weingarten an dem Mittereke, des ein ieuch ist vnd leit zwischen Sighartes weingarten von pazzow vnd zwischen der Nunnen weingarten von Tuln recht vnd redleich ze chauffen habent gegeben hern Heinreichen von Veltsperch der nv ze Wien purger ist vnd seiner Chon vrowen Gerdruten vmb hundert phunt vnd vmb sechs phunt phenning wienner rnunzz - vnd die vorgenante Vlrich der Schvczlinch vnd sein chvn vrow Leukart habent sich des vorgeschriben weingarten rechte furzicht getan vnd habent in auf gegeben, vnd herman von Freising der des vorgenanten weingarten ze den zeiten perchmaister war an des gotshaus stat, hant in verlihen hern Hainreichen dem vorgenanten. - Diez ist geschehen vnd diser prief ist gegeben do von Christes geburt ergangen warn Tausent iar, drevhundert iar vnd in dem fvnften Jar dar nach des nachsten Sunntages vor dem Palmtage in der vasten.

Source Fulltext: ZEIBIG, Klosterneuburg (=FRA II/10, Wien 1857) S. 95