Ich Ott von Wienner Herwerg hern Albrechtes des Stüchsen von Trautmanstorf Swester Sun vergich vnd tuen chunt - - daz mein frowe, mein Mueter frowe Helena vnd mein brueder Hadmar vnd Weichart, die paid ze Nevnburch begraben sint, vnd auch ich mit gueten Willen meiner hausfrowen frowen Gerdrauten, herrn Weicharts tochter von Planchenstain mit sam in - Vnser isleichez geschaffet vnd gegeben haben vnser rechtes aigens dem Erbern Gotshaus vnser frowen ze Newnburch sechs schilling phenning geltes, di gelegen sint In dem dorf ze Harraz mit so getaner besehaidenhait, daz die Chorherren des vorgenanten Gotshauses ze Newnburch durch vnser sel hail, vnd auch Vnser Vordern alle iar des Phinztages in der Chotemper vor sand Michelstag vnser iartach schulen begen mit Vigilij vnd mit selmesse, geschvch aber, daz die vorgenanten Chorherren den Jartach nicht begiengen, als nun geschriben ist, so sol ich oder mein Hausfrowe dev vorgenant, oder mein nagst Erben sich der vorgenanten Gült Vnderwinden an alle Widerred der vorgenanten Chorherren Vnd haben in dem reht, als ichs vnd mein Vordern gehabt haben. Auch sol ich des vorgenanten Gotshauses Vogt sein Vber die vorgenanten gult an allen nuz. Wann daz die Holden, auf den die gült leit, mir alle iar dienen schullen an sand Michels tag zwelf phenning Wienner Münzze ze gezugnusse, daz die vorgenant gült zue dem vorgenanten Gotshaus chomen sey von mir vnd von meinen Vordern. Daruber Luben auch wir an disem brieff Ich vnd mein hausfrowe frowe Gerdraut di Vorgenant, diselben gült den vorgenanten Gotshaus ze schermen - - Diser sache ze einesicherhait gib ich disen brief mit meinen Insigel versigelt, Vnd durch pezzer Vestenung so hat der Erber herr, her Stephan von Meyssawe vnd mein Oheim, der vorgenant her Albreht ir paider insigel zu dem meinen an disen brief gehangen. Diser sache sint gezeuge der Erber herre her haidenreich der Purchgraf von Gors, dernach her fridreich der hutstoch, darnach during von Seveld, Gerunch hern Choln svn, Dietreich der Schiver vnd ander frum leut. Diser brief ist gegeben ze Wienne, da nach Christes geburtte waren Tausent iar, dreyhundert iar, darnach in dem funiften iar an dem Perhtag.

Source Fulltext: ZEIBIG, Klosterneuburg (=FRA II/10, Wien 1857) S. 93-94