Ich Sewrid der vaizt genant, ze den zeiten Richter, vnd der Rat vnd alle dew gemain der Stat ze Passaw vergechen - Das vnser purger der Swet Gerhart genant vnd sein chun, fraw Diemut vnd hern peters chind des westerburger, dem got genad, Chunrat, Peter, Paldwein vnd ir Swester Diemut dev Gerharts stewf kind sein - irn weingarten ze Newnburgk der ain halbs Jeuch ist, vnd leit in der ziegelgrueb In der nidern schozze vnd haizzet der waihniger, Recht vnd redleich ze kauffen habent gegeben frawen Gedruten von Kriczendorf vmb drew vnd Sibenczigk phunt wienner phenning - mit fridreichs hant ze Newnburgk, der des weingarten ze der Zeit perchmaister was, der in auch verlihen hat der egenanten frawn Gedrauten ze rechtem Perkrecht - geben wir, der Richter vnd die purger ze Passaw frawn Gerdruten - disen brief mit disem hangenden Insigel vervestent vnd mit disen erbern zewgen, her Dietreich der Westerburger, Vlreich der Brobst, Fridreich der hofmaister, Albrecht der Kramer, Marichart der SchrO^eter, yrnund der Scheffweger, die ze der zeit des rats ze passaw phlögen, vnd ze newnburgk her hermann ymian, ain erber richter, Jacob der fO^erster, Gerbot sein brueder, Perchtolt, Gebhart, Otte der huter, Hainrich von Laa, Levpolt zwischen wegen, Sewrid, Fridreich hetzman, Fridreich der En, Otte der humbel, hainreich MO^esel, hermann hetzman, kristan, fridreich der Glacz, Georg lewtwein der schreiber vnd ander ersam lewt - Ditz ist geschehen vnd diser brief gegeben - Tawsent Jar, drewhundert Jar vnd in dem Achten Jar an Sand Agathen tag.

Source Fulltext: ZEIBIG, Klosterneuburg (=FRA II/10, Wien 1857) S. 110-111