Ich Weychart von Pavmgarten vnd mein Hausvrowe ver Breid, vnd mein tochter ver Gedraut vnd mein svn Hainreich vnd Fridreich vnd Hertneyd - daz wir vnsers aigen guetes dacz Schirnestorf haben gegeben ein lehen hincz vnser vrowen auf di stiftvnge ze Newnburch in daz chloster zu einem rechten selgeret, vnd ist daz lehen, do Ruger der Grisel auf saz, vnd haben wir noch auf dem vorgenanten lehen vnser voget recht daz alle iar ist ze drin Pantaidingen ze iczleichem drei phenninge wiener mvnzze, daz werdent alle iar neun phenning vnd anders recht habe wir nicht mer auf dem vorgenanten lehen ze Schirnestorf - Die geczeug sint her seyfrit von haslawe pharrer ze valchenstain, her hainreich der herre von Lyechtenstain, her Chadolt vnd her Willehalm von Pavmgarten, her Chvnrat der hernic von Valchenstain, her Weychart der herinc vnd der herman ymian vnd der Gervnch des Chvln svn von Newnburch vnd ander frvmer leut vil, der namen hie nicht stent geschrieben vnd doch wol des wert sint, daz man in gelauben sol. Daz ist geschehen da von Christes geburd ergangen waren dreuczehen hvndert iar dar nach in dem achten iar der brief ist vber di sache geschriben an sand Cyriaci tag daz ist XVII°. Kalendas aprilis.

Source Fulltext: ZEIBIG, Klosterneuburg (=FRA II/10, Wien 1857) S. 111-112