Wir Perchtold von gotes gnaden Probst, Eberhart der Techent, mit sampt der samnvng der Chorhern ze Newnburch verichen vnd tvn chunt allen den, di disen prief horent oder lesent, die nw lebent vnd hernach chvnftich sint daz wir mit veraintem rat vnser samnunge vnser haus ze Enns in der stat, daz gehaizzen ist der Newnburger Chelr vnd daz besvnderleich vnser ober chamer angehoret, lazzen haben ze rechten Purchrecht Vlreichen dem voln vnd seiner chvn vrown Gerdrauden vnd ir paider erben also, daz sev vnserm obern chamerer alle iar an sant Gorgentag da von dienen schullen ein phunt phenning wienner munzze, geschiecht dez nicht, daz sol gepuezzet werden nach der stat recht ze Ens. Dar zv nach vnsrem alten recht sol vnser ober chamerer legen vnd vercigen in das selbe haus alle iar ob er wil fvmfczehen fueder weines, vnd dar an sol im der vorgenant Vlreich oder swer des hauses wirt ist, fuederleich sein vnd guetleichen tun an dem verchauffen des weines. Dar zu swenne ein steur auf di stat wirt geleit ze Ens, so sol der vorgenant Vlreich oder swer ez nach im inne hat, daz selb haus verrichten vnd versteuren, als pilleich ist. Geschiecht dar vber, des got nicht geb, daz daz vorgenant haus verprunne oder von andern Sachen verdurbe, so sol ez der vorgenant Vlreich, oder swer ez nach im besiczet, hin wider pawn mit sein selbes gut. Geschiecht ouch, daz der ober chamerer chumpt hincz Ens vil leicht mit sechs pherten, swaz der da bedarf ze zwein malen, daz sol der vorgenant Vlreich gelten oder swer des hauses wirt ist. Geschiecht aber, daz wir oder iemant vnsrer chorherrn dar chumt, dem sol derselbe wirt gemach schaffen in dem selben haus nach sein selbes ern vnd schuln auch dieselben zern auf ir selbes phenninge an des wirtes schaden. Nv habent auch der vorgenant Vlreich vnd sein chvn vraw Gerdraut vnd ir paider erben mit vnsers obern chamerer hant, der des hauses Stifter vnd storer ist ze dem vorgeschriben recht vnd dienst freye wal dasselbe haus ze verchauffen, ze verseczen, swi si wellent iren frum da mit ze schaffen, vber daz alles swer daz oftgenant haus chauffet, der sol dem vor benanten chamrer geben ein phunt phenninge ze anlait, vnd swer ez verchauffet sol geben dem selben chamerer ain phunt ze ablaitte. Diser sache zu ainer sicherhait vnd ze ainem vrchvnde geben wir disen prief mit paiden vnsern insigeln versigelten. Diser sache sint geczeug, her heinreich von piela, her Stephan der spitaler vnd her Thomas der priester, darnach her wernhart der schiver, Gerunch, hern Choln svn, Dietrich der schiver, herman von freising, Chvnrat, Rudwein, Gundolt vnd ander frum leut genuech. Diser prief ist gegeben ze Newnburch da man zalt nach Christes gepurt dreuczehen hvndert iar dar nach in dem newnten iar an sant Gregorien tag in der vasten.

Source Fulltext: ZEIBIG, Klosterneuburg (=FRA II/10, Wien 1857) S. 117-118