Ich Weygant von Chriczendorf ze den zeiten richter vnd wir der rat mit sampt der gemaine der stat ze herczogen Newnburch verichen offenleich vnd geben zeerchennen allen leuten, di im lebent vnd hernach chvnftich sint Daz Ruger der Chrump genant cham fur vns in den rat vnd leit vns fur, er vnd sin hausvrowe Gerdraut der got genade, solten gelten mit einander zwey min vierzich phvnt phenninge wienner munzze, vnd do got wolde, daz si menschleich recht begie vnd sturbe, hiet si in lazzen in der selben gulte, pat dar vmb fragen ob er sein haus, daz da leit an dem ecke ze nachst Dietreichs haus des Czistels wvl verchauffen oder verseczen mocht, da mit er daz vorgenant gut gülte wan im sein gelter nicht lenger peiten wolten. Do wart im ertailet mit frage vnd mit vrtail mocht er mit den geltern vnd mit seinen erbern vmbsaezzen erzeln vnd bringen ehaft notdurft, daz er gelten solt die vorgenante gulte er verchauft oder versaczt wol an alle irrunge. daz vorgenant sein haus, damit er den geltern gulte wan des landes recht ist, daz der gelter der nachst erbe ist, vnd als im ertailt was mit frage vnd mit vrtail bracht der vorgenandt Ruger vor vns recht ehehaft notdurft mit den geltern vnd mit seinen erbern vmbsaezzen vnd mit aiden, daz er di vorgeschriben gulte gelten solt, vnd auf daz vorgeschriben recht hat der vorgenant Ruger mit zeitigem rat seiner pesten freunt verchauffet auf daz vorgenant haus drev phunt geldes wienner phenning, die er ierleich dienen sol an sant Merteins tage als purchrechtes||
recht ist, vnd ist das geschehen mit Dietreichs hant dez Czistels, der ze der zeit des houses amptman was vnd mit solcher beschaidenhait, swenne der vorgenant Ruger daz gut gewinnet, daz er daz vorgenant purchrecht mag ab gelösen, so sol er iegleich phunt purchrechtes mit zehen phunten phenning wienner munzze ablösen, vnd sol dev selbe losunge geschehen zwischen sant Merteinstag vnd vaschang, vnd swenne daz geschicht daz Ruger dev vorgeschriben drev phvnt purchrechtes gar vnd genczleich abgeloset, als vorgeschriben ist, so sol er frey wal haben mit dem vorgenanten house allen seinen vrumen ze schaffen, verseczen, verchauffen, geben swem er wil an allen irresal, vnd wan die vorgedachten sache vor vns vnd mit vnser gewissen geschehen vnd gewandelt sint, des geben wir dem oftgenanten Rugern zu einem sichtigen vrchvnde vnd ze einer steten vestnunge disen prief mit unsrer stat insigel vervestent. Dicz ist geschehen vnd diser prief gegeben, do von Christes geburt ergangen waren, Dreuczehen hundert iar vnd in dem nevnten iar an vnser vrowentag ze der liechtmesse.

Source Fulltext: ZEIBIG, Klosterneuburg (=FRA II/10, Wien 1857) S. 116-117