Ich Weigant eisenpeutel vnd vrow Tvech mein hausvrow - daz wir verchauft haben dacz dem ersamen manne Ludweigen von Toblich dem forstmeister vnd ze seiner housvrowen vnd iren erben einen hof, des fvnf lehen sint gelegen auf des gotshauses aigen von Newnburch ze Chrotendorf, vnd hat der ersam herre Brobst perchtolt von Newnburch vns vnd vnsern erben den verlihen ze rechtem purchrecht mit sogetaner beschaidenhait, daz wir im vnd seinem gotshaus alle iar ze sant Michels tag davon dienen schvllen drev phvnt vnd drev schilling phenninge wienner mvnzze - Diser sache sint geczevge her Stephan von Meyssowe, Marschalch in O^esterreich, her Ott von Zelkinge, her Levpolt von Sachsengang, vnd levpolt sein svn, her Alolt von howenveld vnd sein pruder Stephan, her Alber von Schvnberch vnd hadmar sein pruder, dar nach her Wernhart der schiver, her Wolfger von owe, vnd her Vlreich von Chriczendorf, darnach Gerunch chol, Jans von Nuzdorf, vnd Engeldiech von Movrbach - Diser prief ist gegeben da man zalt nach Christes gepurte drevczehen hvndert iar dar nach in dem ainleften iar an sant Julian tage der Magde.

Source Fulltext: ZEIBIG, Klosterneuburg (=FRA II/10, Wien 1857) S. 123-124