Ich Seyfrit von Eistorf vnd ich Vlreich von Chriczendorf vnd ich Jacob der Forster - daz ein chriech gewesen ist zwischen dem ersamen hern probst Perchtolden ze Newnburch an ainem tail vnd Haymen von hoflein an dem andern tail also daz derselbe Hayme sich iach etleich recht haben an den weingarten, di daz gotshaus ze Newnburch von dem tode Rugers des chursner recht vnd redeleich angevallen sint die hie benennet sint, des ersten an einem halben ieuch daz gelegen ist in der Leimgrueb gegen dem velde vber dar nach an einem, der haizzet Liechtweingartel vnd an einem, daz ist ein halbes ieuch, genant der Reutinger gelegen ze hoflein, vnd wan er fvrzoch vnd iach di selben weingarten gehorten in an erbleich von einer vrown, der er ze Mageschefte iach, di weilent der selbe Rudger ze chvnne het gehabt, wart der selbe chriech ze schiedvnge lazzen, also, swie doch sein recht chlain wa\er an den selben weingarten, daz der vorgenant probst Perchtold durch vnser bete willen im gegeben hat fvmf phvnt phenning wienner mvnzze. - Des sint geczeuge her Wernhart der schiver, Gerunch hern Choln svn, herman von freising‚ Engeldiech, Chvnrat, Rudwein, Gvndolt, Wisent von Engenburch, Peter freisinger. - Diser prief ist gegeben ze Newnburch, da man zalt nach Christes gehurt dreuczehenhvndert iar darnach in dem ainleften jar an dem nachsten tag nach dem ebenweich tag.

Source Fulltext: ZEIBIG, Klosterneuburg (=FRA II/10, Wien 1857) S. 122