Wir Fridreich von Gotes gnaden Herczog ze Osterreich vnd von Steyr, Verichen offenleichen an disen prief. Daz di erber vrow Mechtilt weilen Vlreichs witewe von Riczendorf hat vor vns bewert, daz si nicht muge vor ehafter not versparen den hof ze Alpetow, den ir wirt vnd si habent ze Purchrecht gehabt von dem Gotshaus ze Newnburch, vnd ist derselben witewen reht vnd redeleich erteilt. Daz si den vorgenanten hof ze Alpetow verchauffen muge, swi ez ir fuge, seit si ehaft not dar zu bedwinget. Der prief ist gegeben ze Newnburch enhalb Tunow nach Christes gepurt vber Drevzehen hvndert Jar in dem zwelften Jar des Suntages vor sant Thomas tag.

Source Fulltext: ZEIBIG, Klosterneuburg (=FRA II/10, Wien 1857) S. 138