Ich Ruedolf vnd Ich Hainreich zwen brueder, hern Vlreiches svn von Chrizendorf, dem got genad, veriehen - daz wir durch recht ehaft not vnd ovch von des geltes wegen, daz der vorgenant vnser Vater vns ze geben nach seinen tod lazzen hat, nach vnser frevnd rat Verchovffet haben vnsern acher, der pei dem Gozzleins see gelegen ist mit samt der Wisen vnd dem Werd, der darzu gehoret, der geachtet ist fur Vierzich Jeuchart von ainen rain Vnz an den andern, dem Ersamen vnsern herren Brobst Berhtold vnd der Samnunge der Chorherren ze Neunburch vmb Vierzich march lO^etiges silbers Wienner gewichtes, der wir gar vnd ganzleich gewert vnd verrichtet sein hinz den Juden, von den da mit vnser brief ledich worden sint - - - Vnd haben ouch wir Im vnd dem Gotshovs mit der hant Engelbrechtes des alten Sluzzler, der sein rehter Perchmaister ist von des herczogen wegen ze Osterreiche ze rehtem scherm gesezet vnsern weingarten, der der halser ist genant, vber dem Vorgenanten acher fu^er allen chrieg - - - Vnd durch pezzer cherhait dises chovffs vnd ovch des schermes hat vnser Gesweye Reimbot, des Huebmaisters svn, der ouch diesen scherm mit vns gelobt hat, sein insigel zu dem vnsern an disen brief gehangen. Diser sache sint gezeuge: her Wernhart der Schiver, Dietreich sein sun, friedreich der hutstoch, Durinch von Mevrlinge, Johannes von Nuzdorf, Herman von freisinge, Chunrat Rudwein, Simon von Pelndorf, Gebhart von Ruekerstorf, Gundolt, Wisent von Egenburch, Jacob der Chelner, Peter freisinger, Gotfrit Cholbeche, Weigant von Chrizendorf, Ott der Huetter, Gebhart von sand Mertein vnd ander frum Leut genuech. Diser brief ist gegeben zu Neunburch - - Dreuzehenhundert iar, Darnach in dem fumfzehenden iar an sand Peters vnd sand Pauls tag, der zweier zwelfpoten.

Source Fulltext: ZEIBIG, Klosterneuburg (=FRA II/10, Wien 1857) S. 150-151