Ich Reichgart von Tribaswinchel vergich - daz ich - verlihen han dem erbaern manne Berhtolden dem Wentchramer an dem Hohenmarchte ze Wienne vnd seiner hausfrawen, vron Margreten - meins rehten lehens, des ich han von dem landes fversten in Osterreich allen den zehenten paide weinzehenten vnd traitzehenten, grozzen vnd chlainen, ze velde vnd ze dorf, gestift vnd vngestift, versuecht oder vnversuecht, swie so der genant ist, Vnd den ich gehapt han datz Gukkingen - Vnd habent mir dar vmb geben - anderhalp phunt vnd zwainzich phunt phenning - Vnd gib in daruber disen prief - versigilten mit meinem Insigel. Vnd sint auch des gezevg die erbaern herren her Wernhart vnd her Chvnrat die Pruder von Schavmberch, her Virich von Pilihdorf, her Weichart von Arnstain, her Vlreich von Durenpach, her hainrich der piber von walde, her hainrich der Chrannest, ze den zeiten rihter ze wienne, her hermann von sand Polten zu den Zeiten Pvrgermaister ze wienne, her Nichla von Eslarn, her Otto sein pruder vnd ander frvme levte genvch. - Diser prief ist geben ze Wienne - drevzehen hundert iar, in dem Achzehenten iar dar nach. An sand Antonien tage.

Source Fulltext: ZEIBIG, Klosterneuburg (=FRA II/10, Wien 1857) S. 160-161