Ich Ernste, der Leder er Vnd Geisel sein chvn, wir vergechen offenleich vnd tuen chunt allen Leuten, Daz wir vnser mvle mit sampt dem haus in der Staingrueb mit vnsers purch herren hant Probst Stephans ze Nevnburch gesaczt haben Ruegern dem Tekkendorfer vnd sein erben fur vierzehen march silbers und ain vierdunch fur igleich march zwen vnd sibenczich grozzer pehaimischer phenning. Da von wir im dienen sullen alle iar anderthalb march silbers. Vnd ob wir in zwain iaren daz selb purchreht niht losen vmb daz vorgenant silber, oder ze losen haben, so sullen wir daz vorgenant purchrecht verchauffen, vnd sullen iz bestiften mit einem erbeern manne, der vnsern egenanten herren dem brobst maezzich sei mit dem alten dienste. Haben auch daz gelobt mit guetleichen willen, ob wir des nicht taeten, vnd daz versaumpten, so sol vnser herr, der brobst oder sein anwalt daz purchrecht verchauffen nach der vmbsaezzen rat, vnd den vorgenanten Ruergern des silbers gar vnd gaenzleich weren. Daz dis Wandlung vnd der vorgedacht chauf staet vnd vnzerbrochen beleib, dar vmb geben wir vnsern oftgenanten herren dem brobst disen prief zv einem vrchvnde diser sache versigelten mit des erbeern mannes insigel, Gebharts von sant Mertein. Des ist gezeuch: Chunrad der sibenhosz den zeiten richter, Gerbort der sluzzlar, Christan sein prvder, der Weigant von Christendorf (Chrizendorf), Ott der Hueter vnd ander erber Leut genu^ech. Der prief ist geben vnd diez geschen, da von Christes pur ergangen waren Dreuzehenhundert iar, darnach in dem Nevnczehenten Jar an Sant Vrbanstag ze Nevnburch.

Source Fulltext: ZEIBIG, Klosterneuburg (=FRA II/10, Wien 1857) S. 166-167