Ich Reichze, hern Seifrides wittwe des Chienberger vergihe - daz ich - geschaffet - vnd geben han meinem pruder, hern Chvnradem, dem Nuzdorfer meines rechten Purchrechtes ainen hof, der da leit ze Lenczendorf, dez zway lehen sint - vnd der da dient alle Jar an sant Michels tag dem Chloster ze Newnburch zwaintzich wienner phening ze rechtem purchrechte. Den vorgenannten hof han ich - geben meinem pruder hern Chvnraden dem Nuzdorfer vnd seinen erben - vnd suln auch sie, oder swer denselben hof nach in besiczzet, davon geben alle iar meins svns chinden Chvnrades ainen Mutt waiczes vnd ainen Mutt chornes vor sant Gilgen tage, wolden si des nicht tuen, so solde sie vnser herre der Brobst von Newnburch des twingen, daz sie iz tun, als des landes recht ist, vnd seines aigens recht ist. - Vnd sint auch des gezeug der ersam vnd der geistlich herre, her Otacker zu^e den zeiten apt ze Liernvelde, pruder Marchart der Alsser, her Diether von himperch, Jans von Nuzdorf, Dvrinch von Sevelde, hainreich der Grinczzinger, vnd ander frum Leut genu^ech - geben ze himperch - drevzehen hvndert iar in dem Nevnzehenten Jare, darnach an sant Dyonisien tage.

Source Fulltext: ZEIBIG, Klosterneuburg (=FRA II/10, Wien 1857) S. 175-176