Ich Chvnrade der Sybenhos vnd Ich Gerdraut sein hausvrowe wir veriehen - Daz wir haben gechauft zwo hofstat dacz sand Mertein, die sind gelegen an vnserm haus an der Gaizluchen an dem ekke, da wir auf gelegt haben ein presse vnd ander zimmer, vnd dienet meiner herren Spital ze Chloster ze gruntrecht alle iar aindlef phenning wienner mu^enzze an sand Merteins tag, vnd zu fu^ergeding vier phenning derselben Mu^enzz alle iar an sand Georigen tag, hat vns die zwa hofstet vnser herre Brobst Stephan ze rechtee Purchrecht verlihen allen vnsern frumen da mit ze schaffen, gehO^erent auch die hofstet paide, da wir die presse vnd ander zimmer haben aufgelegt, mit gericht vnd mit dienst hincz meiner herren Spital von Chloster, vnd daz das gericht vnd der dienst von den zwain hofstete dem oftgenanten Spital icht werde gefromd vnd enzogen. Des gib ich Chvnrader der Sybenhos meinen herren von Chloster vnd irm Spital ze vrchvnde vnd zu^e einen gezeuge disen prief versigelten mit meinen Insigel. Des sint gezeug mein O^ehem, her Gervnch, her Dietreich, der Schiver, her Engeldich, Chvnrat Rudwein, wisent von egenburch, Gerbort, der Sluzzler, Christan, sein pruder, Gebhart von sand Mertein, sein Sun Symon, Chvnrad maesel, Chvnrad Schiver, Jacob Gervnch vnd Dietel die reczer. Diser prief ist gegeben - Dreutzehenhvndert Jar dar nach in dem zwainczigistem Jar an sand Georigen||
tag nach Ostern.

Source Fulltext: ZEIBIG, Klosterneuburg (=FRA II/10, Wien 1857) S. 177-178