Ich Hainreich Chrannest, ze den Zeiten Richter ze wienne vergieh - Daz fu^er mich Chvm in der Schranne vrow Margret, Diepoldes hausvrow von als, vnd zaiget ainen prief vmb ainen hof, der da leit dacz Maverlinge, da sei an irret Seifrid der Murre der vorsprech. do da der prief wart gelesen ze gegenburt des vorgenanten Seifrides. do sagt der prief, daz der vorgenant Seyfrid sich fu^erzicht hiet getan des vorgenanten hof vor erbern Leuten, Also daz er fuerbaz nimmer mer chain ansproch schvlt haben gegen dem vorgenanten hof, er noch alle sein erben. Do pat die vorgenant vrowe Margret dar vmb ze vrogen, was nv recht wer, da wart vmb gevraget vnd erthailt ir vrag vnd vrtail. Si schvlt den vorgenanten hof verseczzen, verchauffen, geben swem si wolt an allen chriech vnd an allen irresal. Vnd dar vmb gib ich ir disen prief ze ainem offen vrchunde vnd ze ainem waren geczeug diser sache versigelt mit meinem insigel, vnd sint auch des geczeug her Niclas von Eslarn, her Oft sein prueder, her Nyclas der Polle, her Stephan der Chrigler, her Ortwein, her Marchart der vorsprech, her Hainreich der RO^erer der vorsprech, her Seifrid der orel der vorsprech, vnd ander frume Leut genuech Diser prief ist gegeben - Dreuzehen hvndert iar in dem||
zwainzigisten iar darnach an sant Pangraczentag.

Source Fulltext: ZEIBIG, Klosterneuburg (=FRA II/10, Wien 1857) S. 178-179