Wir Stephan von Gotes genaden Brobst ze Newnburch veriehen - Daz der ersame Ritter, her Ulreich von Zistestorf vnd sein hausvrowe vrow Pendit vnd ir erben von dem hof, den si von vns vnd von vnserm Gotshaus ze rechtem Purchrecht habent, der gelegen ist ze Chrotendorf mit Sechsthalben lehen vnd mit vier vnd zwainczich Jeuch achkers, die darzu gehorent, des wir alles rechter Purchherre sein, Stifter vnd StO^erer, da von si vns vnd vnserm Gotshaus alle Jar dienen svllen ze rechtem Purchrecht an sant Michels tag dreu phunt zwelif vnd drei Schilling phenning, alles wienner munzze wen aber der dienst ze dem vorgenanten tag nicht gedienet wird, Daz svl des nechsten tages von in gepezzert werden nach dem gemain Landesrecht vnd auch nach dem recht, daz daz selb vnser gotshaus hat an anderm vnserm gute, swa daz in dem Lande ze O^estreich gelegen ist, auch haben wir freyen gewalt, vmb denselben dienst ze phenden an all ir wider rede, vnd mit irem guetleichen willen, vnd habent auch si die genad von vns, swa si in dem Lande als vil gulten vail vindent, die auch vnserm Gotshaus also wol gelegen ist, die sullen si chauffen vnd sullen die gelten nach des Landes recht, vnd als gult vail ist in dem Lande, vnd svllen auch wir die ver vol von in nemen an all wider rede, vnd dann ist der vorgenant hof mit sampt dem daz dar zu gehoret, ledich von vns vnd von vnserm Gotshaus‚ also daz si vnz furbaz nicht mer von den ze dien haben, noch ensullen. - - Dez sint gezeug her Gerunch der Chol, her Dietreich der Schiver, her Chvnrat der Nuzdorfer, Dvrinch von Meurling, Johanns von Nuzdorf - Diser prief ist geben - Dreuczehen hvndert Jar In dem fvmf vnd zwainczigistem Jar an vnsers vrowen abent ze der Liecht Messe.

Source Fulltext: ZEIBIG, Klosterneuburg (=FRA II/10, Wien 1857) S. 211-212