Wir Stephan von Gotes gnaden Brobst ze Neunburch veriehen - Daz Vlreich, Georig, Ruger vnd Vlreich, hern Vlreichs son von Cisteinstorf, dem Got genade, mit vnserer hant gegeben hawent, hern Chůnraten, dem Nustorfer vnd seinn eriben sechs schill. phenn. gult, di gelegen sint auf einem halben lehen datz Chrotendorf, da zehen Jeuchart achers in geheurent, daz Rudel von v\eezense inne hat, vnd von dem selben halben lehen vnd von den sechs schill. phenn. gult dient man vnserm Goteshause hincz Neunburch allen iar ebichleich an sande Michels tag sechs pfen. zv rechtem purchrecht, vnd da wider di sechs schill. pfen. gult hat her Chůnrat der Nustorfer mit gunst vnd gůtem willen aller seiner eriben zv wider wechsel gegeben den vorgenanten herren vlreichs sunne vnd Chindern von Cisteinstorf seines rehten aigens fvmf schill. pfen. gult, di er gehabt hat datz Streubleinstorf auf zwain hofsteten. Sul auch seu her Chunrat der Nustorfer vnd sein eriben mit den sechs schill. pfen. gult furbaz allen iren frumm schaffen, verchaufen, versetzen vnd geben, swem seu wellen an allen irresal, als purchrehtes reht ist in Osterich, Wan der vorgenant widerwechsel mit vnser Brobst Stephans hant geschehen ist. Des geben wir hern Chůnrat dem Nustorfer vnd sein eriben disen prif - versigelten mit vnserm Insigel. Der prif ist geben - Dreutzehen hundert Jar, dar nach in dem ain vnd Dreizzigstem Jar an sande Mareyn Magdalen tag.

Source Fulltext: ZEIBIG, Klosterneuburg (=FRA II/10, Wien 1857) S. 243