Ich Wolfhart von Pv\ehsendorf vnd mein Hovsfrowe Ver Margret Ver Jehen offlich an disen Prief - Daz wir vier vnd Newn Schilling phenning gult wienner mvnz, di man Vns dienet ze PO^ehsendorf an sand Mychelstag von einem lehen, Acht vnd ein Phunt phenning von einer Hofstat Sechs vnd zwaingk phenning der vor genant mvnz verchauft haben mit guetleichen Willen der Edeln Herren hern Dietrichs von Chirhling vnd sein Prv\eder hern Alberts, die des Gvetes lehen hant habent - dem Erbern mann Petrein dem dringer vnd seiner hovsvrowen vern Elspeten vnd allen Iren Erben vmb Newn Phunt Wienner Phenning, der wir recht vnd redlich vnd schon gewert sein - gegeben ze einer Vrchund versigelten mit minen anhangvnden insigel, darzue so versigel ich in ovch disen prief mit des erbern man Insigel, hern Jacobs des Grabmer, vnd mit hern Vlrichs Insigel des fu^echssen, di der sach zeugn sind mit andern erbern Leuten, di hie genant werdent: her Vlrich von Lengenveld, her Nyclo von Veltz, vnd sein pruder her Hainrich. Der prief ist gegeben - Dreutzehenhvndert Jar darnach in dem ainz vnd dreizkisten Jar des nachsten mitichs nach dem Sunbentag.

Source Fulltext: ZEIBIG, Klosterneuburg (=FRA II/10, Wien 1857) S. 242