Ich Gerunch hern Choln Svn von Newnburch, Purchgraf auf dem Chalnperg vnd ich Chunrat der Huebmaister Veriehen - Daz wir ein schidung beschaiden haben zwischen Juncfrauen Maechthilten, hern Friedreichs Tochter von Riczendorf vnd Dietreichen dem||
Starichant von Stadlawe vmb ein chrieg, vnd vmb ein ansprach, di die vorgenannt Maechtilt gehabt hat auf einen hof ze Alpertawe, vund haben auch die schidung beschaiden mit ir paider guetleichen willen also, daz der Brobst von Newnburch des guetes, des er noch an dem egeschiden hof daz Alpertawe gelten svl der oftgenannten Junchvrowen Maechtilten hern Fridreichs Tochter von Riczendorf gelten sol vier vnd zwainzich phunt wienner phenning, vnd daz zwischen in aller Chrieg fu^erbaz vmb den hof daz Alpertawe gelegen sei, vnd wer die schidung prech, vnd nicht stet behalten wolt, der wer beliben dem Herczogen hundert wienner phenning, vnd den schied Leuten hundert phunt phenning. Vnd daz wir di schidung also beschaiden haben, vnd fu^erbaz stet bleiben schulle, Da geb wir dem prief vber dem erbern herren, dem Brobst von Newnburch ze einen offen vrchund vnd ze einen waren gezeug der sach versigelten mit vnsern Insigeln. Der prief ist geben - Dreuzehenhundert iar in dem zwei vnd dreizzigisten Jar an sant Niclas tag.

Source Fulltext: ZEIBIG, Klosterneuburg (=FRA II/10, Wien 1857) S. 245-246