Wir Albrecht von Gotes genaden Herczog ze O^esterreich vnd ze Steyr Veriehen - Daz wir dem chrieg, den der Erber geistleich man, Brobst Stephan vnd daz Capitel dez Gotshaus von Newnburch an einen tail, vnd vnser getrewen, Hainrich und Fridreich gepru^eder von Paumgarten an dem andern tail mit einander gehabt habent vmb die Vogtey vnd daz gericht ze Schirnesdorf, da fu^er der Brobst den Paumgartnern zway vnd dreizzigch phunt wienner phenning geben vnd verrichtet hat, nach vnserm rat vnd haizen also beschaiden und bericht haben, mit ir paider willen vnd gunst, daz die vorgenanten von Paumgarten mit derselben vogttey vnd gericht ze Schirnestorf noch ir Erben fu^erbaz nichtes nicht ze schaffen sullen haben, wan alain vmb die sache, die an den tod gend , waer aber, daz die Vorgenanten, der Brobst vnd daz Capitel dez Gotshaus ze Newnburch fu^erbaz in dem selben dorf mer Leut vnd gu^et chauften aůf dem sullen die Paumgartner Vogttey vnd gericht haben, als si ez ieczund habent. Ez sullen auch die Leut, die der Brobst vnd daz Capitel ieczund habent, und die si noch chauffent, daz selbe recht an der Wayd habe, als ander Leut in dem dorf, vnd da von nicht mer tuen, denn ander Leut in demselben dorf ieczund tuen. Vnd daz der spruch also stet vnd vnzebrochen beleib, dar vber so geben wir demselben Brobst vnd dem Capitel desselben Gotshaus ze Newnburch disen prief ze ainen offenn Vrchunde versigelten mit vnserm hangunden Insigel. Der ze Wienne geben ist - Tausent Drevhundert Jar, vnd darnach in dem vier vnd dreizzigisten Jar an dem Sunntage in der Vasten, so man singet Oculi mei semper.

Source Fulltext: ZEIBIG, Klosterneuburg (=FRA II/10, Wien 1857) S. 249