Ich Peter der V\otz vnd mein Hausvrow vrow Hilt wir veriehen - daz wir durch vnser sel hail vnd durch rnerung dez gotes Dienstes mit vnsers perchherren willen hern Hertneidez von Losenstain geschafft vnd gewidmet haben zu ainer Ewigen Messe auf sande Peter vnd sand Lienharts Alter, der do leit in der Chapellen vf dem Charner dacz sant Gilgen in der pharre ze Newnburch marchthalben ain Weingarten, dez ein halbes Jeuch ist vnd leit ze Nustorf an dem stainperge - vnd zwai phunt wienner phennig geltes di do ligen auf vnserm hause, daz do leit ze nachst niderhalbe Hainreichen dez sachken havse der ze den zeiten Richter waz - also beschaidenleich daz der Pharrer ze Newnburch Marchthalben - der den weingarten an nucz vnd gewer hat - alle tag ierleich ein mezze haben svl in der egenannten Chappell vf dem Charner an irre danne ehaftnot, also daz ain priester chranche wurde. Wer aber daz der alter in der chapelln ze lange vnd vber rechte an mezze beliebe, so sulle wir vnd vnser paider erben, oder ob wir vnd vnser paider erben nicht weren, der Richter vnd der Rat ze Newnburch Marchthalben ganczen vnd vollen gewalt haben mit rat vnd mit gewizzen den weingarten vnd die zway phunde geltes geben auf ein ander gotshaus - vnd dannoch vm samnung vnd vm den schaden, den di pharre do von neme, svll der Pharrer gevallen in die puezze di im vnser herre pischof Albrecht von Passaw hat auf gesaczet an seinem brief, den er vber di sache zu einer bestettung geben hat. - geben||
wir disen Prief dem Pharrer ze Newnburch Marchthalben versigelten mit der stat insigel - Dreuzehen hundert Jar darnach in dem vier vnd dreizzigistem Jar an sande Veitz Tag.

Source Fulltext: ZEIBIG, Klosterneuburg (=FRA II/10, Wien 1857) S. 250-251