Ich Georig der Snayzauf vergich - Daz ich gelten sol Plu^emen der Judinn vnd irn Erben acht march silbers grozzer pehemischer phenning vnd sieben vnd vierczich phunt wienner phenning, Der ich sev wern sol auf sant Merteins tag, Der schierist chumpt. Geschiecht dez nicht, so get fu^erbaz alle wochen auf der march ein grozzer phenning gesuechs, vnd auf daz phunt sechs phenning gesuechs vnd han in dafur ze phande gesaczt mit meines Perchmaisters hern Symons dez alten Richter hant dritthalb Jeuch weinwachs mit pawe mit alle die da ligent am mitter Echke ze naechst hern Symons weingarten, vnd da man von einem halben Jeuch Der Cappellen hincz sant Mertein ein phunt phenning von dient, an sant Merteins tag ein halb phunt, vnd an sant Georigen tag ein halbes phunt, vnd waz den Juden an dem phande ab get, Daz suln sev haben auf meinen trewen vnd auf alle dev, daz Ich han, Dez gib ich Georig den Juden disen prief - versigelt mit meinem Insigel vnd mit meins Perchherren, hern Symons dez alten Richter Insigel. Der prief ist geben - Dreutzehen hundert Jar, Darnach in dem vier vnd Dreizzigistem Jar an sant Margareten tag.

Source Fulltext: ZEIBIG, Klosterneuburg (=FRA II/10, Wien 1857) S. 251