Ich Alhait, Reicholf`s Witibe, dem Got genade vergich - Daz ein Chrieg waz zwischen mir vnd meinen aydem Jacoben vnd seiner Hausvrowen meiner tochter katrein vmb allez daz eribe, daz ich vnd mein erart wirt Reicholf mit einander gehabt haben, Daz allez hie dishalb der Tu^enawe in dem gericht ze Newnburch Chlosterhalb gelegen ist, vmb ein haus, leit auf dem Anger ze naechst der Engelprechtinne vnd vmb ain Jeuch Weinwachs, leit an dem Puechperig, vnd vmb ain halbes Jeuch Weinwachs Leit in der Cholngru^eb. Desselben Chriegs haben wir vns pedenthalben mit gutem willen gesaczt an vier erbaer Ritter, an Hern Haugen den Floyt, zu den Zeiten Richter ze Newnburch, an Hern Christan den Sluzzler, an Hern Gerungen, den Choln, vnd an Hern Dietreichen den Schiver die habent ez geschaiden nach iren trewen also, daz ich vor genant Alhait daz egenant eribe alles hie ze Newnburch in nucze vnd in gewer mit zeitleichem paw vnverchumberts zu rechten Leipgedinge haben sol vncz an mein tod, vnd nach meim tode sol daz egenant eribe allez ledichleich an gevallen mein Tochter Katrey, Jacobs Hausvrowm vnd ir eriben mit allem nucze, Wie si ez vindent ze pawen oder ze lesen. Daz der schiedunge fu^erbaz also staet gancz vnd vnczebrochen an allen Chrieg beleibe, vnd wann ich Alhait nicht aigens Insigels han, des [268] gib ich meiner Tochter Katrey vnd irn eriben disen prief zu ein warn zeug versigelten mit meiner Amptleut Insigeln, Hern Leupolts dez Gundramstorfer vber den weingarten in der Cholngrueb, vnd mit Chunrats des Czistels Insigel vber das haus auf dem Anger vnd vber dem weingarten an dem Puechperig, vnd mit der egenanten schiedleut Insigeln - vnd swer der schiedunge vnder vns prichet vnd widerredet, vnd sie nicht staet haben wolt, der sol geben zu widerwet dem Herczogen dreizzich phunt phenning vnd den schiedleuten dreizzich phunt, vnd ains dem andern dreizzich phunt vnd hat darzu alleu sein recht verlorn. Der prief ist geben - Dreuczehenhundert Jar, dar nach in dem acht vnd dreizzigisten Jar an vnser vrawen tag zu der Schiedunge.

Source Fulltext: ZEIBIG, Klosterneuburg (=FRA II/10, Wien 1857) S. 267-268