Ich Vlreich vnd ich Hainreich, ich Johann vnd ich Chunrat, Vnd ich Wolfart von Stoizendorf Veriehen - daz allez daz gut, daz wir ze Stoizendorf haben, daz vnser Vater vnd Vnser Mu^eter, Vnser En vnd Vnser Ane lazzen habent, iz sei daz, daz wir ze Aygen, ze Lehen oder ze Purchrecht gegeben haben, dieselben gut allen hab wir nach Erwerger herren vnd nach guter Vreunt Rat vnd nach gewisser Chuntschaft ze rechten Purchrecht emphangen von dem Erwergen herren Probst Rudwein ze Neunburch, vnd von dem Gozhaus vnd dem Convent daselbens gemain - Vnd Schulen auch wir vnd vnser erben dieselben gut innehaben vnd verdienen alle iar an sant Mirteinstag als Purchrechtz recht ist, vnd dez Landes recht ze Osterreich. Iz schulln auch fu^erwaz alle Vnser prief, de wir V\eber die vorgenanten gut haben, tot sein vnd chain Chraft haben. Vnd daz diseu Wandelung stat vnd vnzebrochen beleib, geben wir - disen prief dem egenanten Gotzhaus ze Newomwurch versigelten mit vnsern Insigeln vnd mit der Erwergen Leut Insigeln Stephans dez Redenprunner, vnsers Swagers vnd Otten von Chirchperch vnd Alberz seinez pruder, vnd Dietmars des Holzmans - dez sint auch zeug diser sach die Erwergen Ritter: her Gerunch der Chol, her haug der flO^et, her Dietreich von Grunderstorf vnd die erwergen Leut Peter der Freisinger, der Wisent von Ru^ekkerstorf - Der prief ist geben - dreuzehen hundert Jar vnd in dem acht vnd dreizzigisten Jar an der heiligen Zwelfpoten tag Sant Philips vnd sant Jacobs.

Source Fulltext: ZEIBIG, Klosterneuburg (=FRA II/10, Wien 1857) S. 266-267