Ich Dietreich der Schiver Ich Vergich - daz ich nach meiner nachst pesten frewnt rat, vnd auch nach meiner Chint rot geschaft vnd auch geben han von meinen farunt guet durch meiner sel willen - So han ich geschaft dreizzich phunt Wienner Pfenning in meiner herrn Oblay - So han ich auch in die Custrey geschaft ein halb phunt phennig gelz, daz ich auch ze Lehen gehabt han Von dem Gozhaus - So han ich auch geschaft zehen phunt phennig Vmb zway tuech , daz ein tuech schol man geben hincz frewn, daz ander schol man mein herrn geben. So han ich geschaft zwai phunt phennig Vmb Wachs, vnd zwai phunt phenning Vmb Opferphennig, vnd dreu phunt phennig, daz man mich damit westaten schol, vnd den subenten Vnd den dreyzgisten mier domit wege. Vnd zway phunt phennig hinz den Frown. So han ich geschaft hinz Sant Jacob funf phunt phennig - So han ich alle meinen Lehen geschaft mein sun Pertolten‚ Vnd hern Mychels Chint Lewbolten vnd Seyfriden also, daz er dieselben Lehen mit in aufenphohen schol, Vnd schol auch Perchtolt mein sun die Lehen Inne haben Vntailt vnd Vnverchumert, Vnd swaz nuz vnd dienst davon chom, die zway tail||
schol er nemen, Vnd daz drittail schol er den Chinden geben. Wer aber dann daz, daz ich Perchtolt an Erben verfuer, oder nicht wer, so schullen die Lehen auf die vorgenant Chint fallen. Wer aber dann daz, daz die Chint zu iern Jarn chammen, vnd auch an Erben verfuern, oder nicht wern, so schollen die Lehen herwider gefallen auf Pertolten vnd auf seinev Chint noch dez Lanz Recht in Osterich. Vnd pey der Wandlung vnd pei dem geschaeft ist gebesen der Erber herr, Probst Ruedwein, vnd her Vlrich der Guster, vnd her Peter der Chelner, vnd her Ott der Parzenprunner, vnd her Marquart, meins hern Chaplan, vnd her Gerunch der Chol, vnd her hauch der floyt, vnd her Dietreich der Gundramstorfer, vnd Peter der Freisinger, vnd Wisentn von Egenburch, vnd Chunrad der Schifer, vnd Perchtolt mein svn, vnd Stepfan der Spaismaister, vnd Peter sein sun - Der Brief ist geben Von Christes gepuert - dreuzehen hundert Jar, darnach in dem zway vnd Vierzigsten Jar an sant Thomas tag Vor Weinachten.

Source Fulltext: ZEIBIG, Klosterneuburg (=FRA II/10, Wien 1857) S. 290-291