Ich Andre der GO^erl von Rappotztal vnd ich Vlreich pharrer ze Chvnring vnd ich Nycla dez vorgenanten Andres svn Wir veriehen - Daz der erber vnser genediger herr vnd vreunt her Vlreich ze den zeiten techent vnd pharrer datz sand Stephan auf dem Wachrain - gemachet hat im selbe vnd auch vns vnd allen seinen vordem ein ewiges selgeraet pey dem gotzhaus vnd dem chloster datz Sand Andre pey der Traysem gelegen, Dem er gegeben hat ainen weingarten an mukcherawer perg ze Nevnburch gelegen den er vmb||
sein aygen guet gechauffet hat wider hern Nyclan weylent pharrer datz Hoflein, da man alle iar von dienet in dem Lesen aynem Emer weins ze perchrecht in den weingarten ze nachst da pey gelegen der do haizzet der Pusenperger, vnd der do ist hern Vlreichs dez pharrer von zwentendorf vnd seiner pruder, den er vns, mir vorgenanten Andren dem Gorlein, vnd besunderleich meinen sunen hern Vlreichen vnd Niclasen vormaln gemainet hat zu geben, dez doch nicht geschach noch geschechen ist von aufgeben vnd von enphahen mit Perchmaisters hant. Mit demselben weingarten schol der Probst datz sand Andre vnd sein samenung furbaz allen iren frumen schaffen - Vnd darvber geben wir - disen prief versigilten mit vnsern Insigeln. Der prief ist geben - dreutzehen hundert iar darnach in dem fumf vnd viertzigistem Jar dez nachsten Montages nach dem ersten Suntage in der ersten Vastwochen.

Source Fulltext: ZEIBIG, Klosterneuburg (=FRA II/10, Wien 1857) S. 306-307