Ich Laurencz der verprunnen genant vnd ich Margret sein hausvrow - wir veriehen - Daz vns der erber man her Jacob - mit seines amptmans hant hern Chunrats dez Czistel - lazzen hat seinen weingarten an dem Puechperig, dez ain Jeuch ist, vnd leit ze naechst Nyclas, dez Selden aydem weingarten, da man alle iar von dient in dem lesen Drithalben Emmer weins vnd suecht Dreutayding in dem iar vnd drey phenning ze voitrecht - zehen iar zehen nu^ecz also beschaidenleichen, daz wir in die zehen iar alle iar da von dienen sullen vier phunt phenninge Wienner Mu^enzze - Sullen in die zehen jar dar in fueren die ersten drev Jar alle iar Dreizzich fueder gu^etes mistes, vnd die siben Jar alle iar zwainczich fu^eder mistes, vnd di zehen iar alle iar Sechs tausent stechen an alle ir mue. Sullen wir den weingarten haben in rechtem guetem mittern paw‚ Sullen wir perchrecht vnd zehent davon geben, aber taiding vnd voitrecht sol her Jacob, oder swer den weingarten inne hat verrichten, chem aber weingart steur auf, die sol her Jacob auch verrichten oder swer den weingarten besiczet. Swen aber der weingart angevellet ez sei mit heirathen oder mit verchauffen, oder swie daz chumt, dannach sullen wir den stand die zehen iar haben an allen chrieg, als vnser paide prief habent, vnd paiden fur den dienst - seczen wir - ze phande - mit vnsers Amptmans hant des Erbern mans, des ersamen mans, hern Chunrates des Schiver die vberteur auf vnserm haus in der weitengazzen ze naechst Nyclas des Manseber haus mit dem weingarten dar an mit paw, mit alle, daz den Juden stet zwelif schilling dienstes mit dreuczehen phunt phenninge abzelosen, als der Juden prief hat - des gib ich - disen prief versigelten mit hern Chunrats des Schiver vnsers Amptmans Insigel Dez sint geczeug Chunrat der Czistel vnd pilgreim sein geswey, Gerunch vnd Leupolt di Reczer, Jacob an dem griez, Friedreich der zeuner, Nyclas, Gundolts svn, Gundolt von Merperg, Alber der Schreiber - Dicz ist geschehen - Dreuczehen hundert jar in dem Sechs vnd vierczigistem Jar an der heiligen Junchfrawen sand Kathrein tag.

Source Fulltext: ZEIBIG, Klosterneuburg (=FRA II/10, Wien 1857) S. 312-313