Ich Chvnrat‚ zu den zeiten des Brobsts Amptman von Newnburch Vergich - Daz fu^er mich chom fu^er rechtes gericht der Erber man her Vlreich von dem ChO^etweich vnd chlagt mit vorsprechen auf Vlreichs Prantstat des Fuetrer gelegen vor Schotten tor ze nechst der Newnburger hof vmb ain phunt wienner phenning versezzens purchrechts, vnd vmb alle zwispilde, die mit recht darauf ertailt sint, Als ver daz ich im mit recht poten dar auf gabe Friedreichen vnd Otten den Hekchlein, die zwen vorsprechen habent darvmb gesagt mit iren trewen vor rechtem gericht, als sev ze recht scholten, daz sev die Prantstat mit samb den vmbseczen habent beschaut vnd geschaczt, daz si so tewr nichten ist, als daz versezzen Purchrecht vnd die zwispilde, die mit recht dar auf ertailt sint. Vnd wart gevragt, waz recht were, do gevil do dem selben Vlreichen von dem ChO^etweich mit vrag vnd mit vrtail, er schvlt mir mein recht geben, daz hat er getan, vnd scholt ich in der Prantstat gewaltich machen vnd an die gewer seczen, daz han ich auch getan - Vnd wan ich selber nicht aygens Insigils enhan, Dar vber gib ich im disen prief versigilt mit meins herren insigil, hern Petreins des freysinger, zu den zeiten Obrister Chellner in dem Chloster ze Newnburch. Der prief ist geben ze Wienne - Dreuzehen hundert iar, dar nach in dem acht vnd vierczigistem Jar des nachsten Sunntags nach sant Blesen tag.

Source Fulltext: ZEIBIG, Klosterneuburg (=FRA II/10, Wien 1857) S. 323