Wir Prueder Chvnrat zu^e den zeiten Apt vnd der Convent gemain dacz dem heiligen Chreucz veriehen - Daz wir, - ze einem widerwechsel gegeben haben vnsers rechten aygens dez ersten Achczich meczen waiczs geltes, vnd Sechs mu^ette und viertzehen Meczen habern geltes vnd Sechs phunt wienner phenning geltes an Nevn phenning, daz alles gelegen ist ze Eberhartsdorf auf bestiftem gut behauster holden, vnd ainen mutte chorn vnd zwen mutte habern geltes von einem zehent daselbens ze Eberhartsdorf, vnd fumf phunt vnd Sechczich phenning wienner Mu^enzze geltes, di da ligent ze Steten auf bestiftem gut behauster holden, die selben Gu^elt alle haben wir ze einem rechten widerwechsel gegeben - Dem Erbern geistleichen herren Brobst Ru^edwein dez Gotshaus vnser vrown ze Newnburch Chlosterhalben - Da engegen so habent si vns vnd vnserm Chloster auch ze einem widerwechsel gegeben irs rechten aygens di gu^elt, di hernach geschriben stet. Des ersten fumf phunt vnd drey vnd Dreizzich phenninge wienner Mu^enzze geltes, vnd fumf schillinge Chaes geltes an zwelif Chaes, daz ie der Chaes ains wienner phenning wert sei, Daz alles gelegen ist ze Pfafsteten auf bestiftem gut behauster holden, vnd drev phunt wienner phenning geltes auf denselben holden fu^er Taydinge phenning vnd fu^er Mal phenning vnd zwey phunt vnd drev schilling vnd fumfczehen phenning wienner Mu^enzze geltes da selbens ze Phafsteten auf vberlent - Dar vber so geben wir - disen prief - versigelt mit vnsern paiden anhangunden Insigeln. Diser prief ist geben dacz dem Heiligen Chreucz - Dreuzehen hvndert Jar, darnach in dem acht vnd vierczigistem Jar an dem Ebenweich tage.

Source Fulltext: ZEIBIG, Klosterneuburg (=FRA II/10, Wien 1857) S. 322