Ich Rueppel des Vischer Svn von Nuzdorf vnd ich Anna sein hausvrow wir veriehen - Daz wir - mit vnsers Perchherren hant, des Erbern herren hern Leutolts von Potendorf verchauft haben vnsern weingarten, des ein halbs Jeuch ist an ein zwelftail, leit an dem Stainpu^echel ze Nuzdorf ze naechst des Erbern herren Weingarten, hern Ruedolfs des Tru^echsaeczen, Pharrer ze Newnburch, da man alle iar von dienet ein viertail vnd vier Stauf weins ze Perchrecht, vnd ein helblinch ze voytrecht - vmb Sechs vnd fumfczich phunt wienner phenninge - den Erbern Pharrleuten gemain ze Enczestorf, die in zu einer rechten Widerlegung gechauft vnd gemacht habent fur vier phunt wienner phenninge geltes Purchrechtes, di man vor von der Pharre Sand Katreyn dacz Enczestorf alle iar gedient vnd geraicht hat der Pharre hincz Sand Gilgen ze Newnburch, die selben vier phunt geltes Purchrechtes sint mit dem vorgenanten vnserm weingarten genczleichen vnd gar abgelediget vnd gelO^est, also daz er furbaz ewichleich pei der Pharre dacz Sant Gilgen ze Newnburch fu^er die egenanten Gu^elt schvl beleiben - Dar vmb so geben wir in disen prief - versigelten mit vnsers Perchherren Insigel, des vorgenanten herren hern Leutolts von Potendorf, vnd mit der erbern Leute Insigel hern Jacobs von Nuzdorf, hern Duringes Svn von Sevelt vnd mit hern Nyclas Insigel in dem Perchhof dacz der Heiligenstat - Diser prief ist geben - Dreutzehen hundert Jar dar nach in dem drev vnd fumfczigisten iar an dem nachsten Svnntag nach dem Phingstage.

Source Fulltext: ZEIBIG, Klosterneuburg (=FRA II/10, Wien 1857) S. 345-346