Ich Nyclas von Pechlarn vnd ich Mert sein svn Vergechen - daz wir - durch vnser vrown lieb willen vnd durch vnser sel hail willen - verschriben vnd gemacht haben auf vnserm weingarten des ain halbs Jeuch ist gelegen ze Grinczing an dem Sunperg ze nachst der purger Spitals weingarten von wienne vnser vrown chloster ze Newnburch ain viertail weins ze Perchrecht vnd ain wienner phennich ze voytrecht - Vnd des zu vrchunde so geben wir in disen brief versigelt Ich vorgenanter Nyclas von Pechlarn mit meinem Insigil vnd hern Pernharts des physings Insigil vnd mit des Jansen des Goltzstains Insigil von Peczleinstorf, zu den zeiten Amptman vnd pergmaister der Edeln vrown vron Anna, hern Jansen witibe von Chunring von Sevelde - Vnd wann ich vorgenanter Mert meins insigels zv dierr zeit nicht gehaben mag, So verpint ich mich vnder den vorgenanten Insigiln alz daz stet ze haben, daz vor geschriben stet. Diser brief ist geben - dreuczehen hundert iar darnach in dem fumf vnd fumfczgisten iar des vreytages vor dem Palm Tag.

Source Fulltext: ZEIBIG, Klosterneuburg (=FRA II/10, Wien 1857) S. 360-361