Wier Ortolf von Gutes Genaden Brobst des Goteshaus vnser Vrowen ze Neunburch, Nyclo, der Techent, Pyligreim der Chelner, Marichart der Siechmaister, Chunrat der Ramunch, ze den zeiten Pharrer daz sand Mertein Veriehen - daz fuer vns chomen Gerunch der Verich, Elspet dew Chlammerinne, Katrey dew Stephinne, vnd Margret dew helblinginne, vnd leuten vns fuer iren abganchk vnd presten ir Zechpru^eder, Vnd ir Schef Leutzeche, daz dew mit dem tode alle waerden abgangen Vnzen an sew Virew, Vnd besarigten, daz es wurd dew bedachtnusse aller Gelaubhaeftigen selen, dew in der Schifleutzeche waerden gewesen, gar vergessen vnd, vnd bedachten sich des mit mut willen vnd mit verainten Rat, Sew wolten dewselben Schefleutzeche widem vnd geben ze der Pharr hinz sand Mertein - Vnd sol des ein igleich Pharrer daz Sand Mertein, swer der ist, Verweser sein vnd derselben Schefleut Zech Obrister Zechmaister sein, - So suln auch alle iar ains im Jar Zechtaydinge haben in der quatemper vor Weinachten, Vor des Suntages, vnd swer danne in derselben Zech Zechbruder ist, der sol geben den iar schillinge mit einander, ez sei ein Mann, oder ain Vrowe sechzehen phenninge dem Pharrer, Vnd dew von Alter darinne gewesen sint, nuer acht phenninge, Vnd swer sich in dew bruderschaft derselben Zech machen will, daz sol geschehen nach eins Pharrer Rat, vnd nach der Zechbru^eder wissen, waz sew Im aufsezen, daz er darin geben sol, daz stet daz einem Pharrer. Vnd swenne ein Zechbruder stirbet, er oder sein hausfrow, So sol Im der Pharrer tuech vnd cherzen leichen, vnd sol Im den ersten wegen, mit Vigilij vnd mit selmesse vnd mit Oblay hinz alter auz der zeche vnd mit wein vnd prat ze Almusen armen Leuten ze geben, alz der zeche gewonhait ist gewesen von alten dingen vnd rechten. Wil man In aber den Sybenten, oder den dreizzigisten wegen, daz sol ein Zechbruder von sein selbes guet dargeben, aber Im sol ein Pharrer dew cherzen ze der Vigily vnd selmesse leichen. Es sol auch ein Pharrer dew zech cherzen vnd daz Zechtuech peszern, wend daz abget, daz er ander Chertzen vnd ander tuech in dewselb zech wider mach, oder geb, als der zech recht ist. - Des geben wir den zechbrudern gemain in der oftgenanten Schefleutzeche disen brief ze ainen waren sichtigen Vrchunde, Versigilten mit vnsern anhangunden Insigiln. Der brief ist geben - dreuzehenhundert Jar, darnach in dem Sechs vnd fu^emfzigisten Jar an dem nachsten Maentag nach sand Mathiastage.

Source Fulltext: ZEIBIG, Klosterneuburg (=FRA II/10, Wien 1857) S. 369-370