Wir Probst Ortolf des Goczhaus Vnser frawn zu Neuburch Chlosterhalb vnd ich Niclo, der Techent, Vnd der Convent daselbs, Ich Ruedolf Drussecz, Pharrer zu Neuburch Marchthalben des Gozhaus sand Gilgen, Wir veriehen ayntrechtigchleichen mit einander, das wi\er - ausgewechselt haben mit vnserm herrn Chunrad dem Gerhertlein zu den zeiten Pharrer ze Enczestorf vnder dem Pusenperg vnd mit den Pharrleuten daselbs deu acht Phunt Phenning geltes Wienner Muniz, deu er vns alle iar von seiner Chirchen daz eegenanten Enczestorf ierleich dienen scholt zu einer Wirderlegung dem vorgenanten Goczhaus Sand Gilgen zu Neuburch Marchtalben Vmb zewen Weingarten, vnd der ainer Lait zu Nusdorf an dem Stainpuchel - ain czweliftail ain halbs Jeuch, vnd dienet dem erbern herren, hern Leutolden dem Potendorfer alle iar ain Virtail vnd fier Stauf Most zu Perchrecht, vnd ain Helblinch zu foyt recht, vnd nicht mer, vnd der ander Weingart gelegen zu Enczestorf in dem Hewweg vnd haizet die Aichen, des ain gancz Jeuch ist - vnd dienet dem erbern man, Dietreichen dem Gileis ain Emmer Most zu Perchrecht vnd zwelif Wienner phenning zu fuergeding vnd nicht mer, Also beschaidenleich, das der oftgenant her Chunrad der Gerhertel, Pharrer zu Enczestorf vnder dem Pusenperg, oder wer do Pharrer ist, alle iar dienen schol Sechs phenning Wienner Munz an sand Gilgentag zu einer ewigen Gedechtnuz der ausgeweselten Gelt, vnd auch zu einer rechten Gehorsam, das das vorgenant Gotzhaus dacz Enczestorf vnder dem Pusenperg zu Lehen sein schol vnd ist von meinen eegenanten Sand Gilgen Goczhaus zu Neuburch Marchthalben. Wi\er haben auch den eegeschriben Weschel mit in vnd mit der beschaidenhait ausgeweselt also, das wi\er vnser zewen oft genant Weingarten fuerbas freyleich vnd Ledichleich haben schullen vnserm Goczhaus - dar vber geb wir vorgenant Probst Ortolf in diesen Brief versigelt mit vnserm anhangundem Insigel - vnd durch pesser sicherhait willen gib ich vorgenanter Rudolf Drussecz Pharrer zu Neuburch Marchtalben in disen prief, versigelt mit meinem anhangunden Insigel. Der prief ist geben - Dreuzehen hundert iar, darnach in dem Seches vnd fumfczisten Jar an sand Vrbans Tag.

Source Fulltext: ZEIBIG, Klosterneuburg (=FRA II/10, Wien 1857) S. 370-371