Ich Peter von Alarn vnd mein Erben wir veriehen - daz wir - durch fuge vnd durich pett mit rechter fu^erzicht vns geauzzent allez dez rechten, vnd aller der Ansprach, die wir vnd alle vnser erben gehabt haben an dem oeden Chaeler ze Newnburch Chlosterhalben gelegen in dem Grashoff ze nachst der erbern Vrowen wen Turn von Lasenhaim von dem genaden des Edlen Hochgeporn Fürsten, Chunikch Fridreichs saeligen, dem Gott genade mit Vrchunde seins briefs, den wir von sein gnaden dor vber gehabt haben, den haben wir geben mit muetwillen dem Erbern herren, Probst Ortolfen dem Volkeinstorfer ze Neunburch Chlosterhalben vnd dem Convent gemain - Vnd haben auch in dar vber ze einer peszern Sicherhait in geben den brief mit fuerzicht, den wir von den gnaden des edlen hochgeporn Fürsten Chunikch Fridreichs saeligen wegen gehabt haben vber den vorgenanten Chaeler - Daru^eber - so gib ich - disen brief versigilten mit meinem aigen insigil des sind auch gezeug mit iren insigiln Cholman der Plesberger vnd Engelhart der Liebentzer, ze den zeiten Hofmaister des Gotshaus ze Neunburch - Der brief ist geben - dreuzehenhundert Jar, darnach in dem Syben vnd fu^emfzigisten Jar des mantages nach dem Palmentag in der Vasten.

Source Fulltext: ZEIBIG, Klosterneuburg (=FRA II/10, Wien 1857) S. 375