Wir Albrecht von Gots Gnaden Herczog ze Osterreich, ze Steyr, vnd ze Kernden Tuen chunt vmb die Chrieg vnd Stözze, die der erber vnd geistleich, vnser Chapplan Ortolf Brobst ze Newnburch an ain tail, vnd vnser getrewn Hainreich vnd Vlreich von Aczenprukk an dem andern tail mit einander gehabt habent von einer waid vnd ains Viechtreiben wegen, daz diselben von Aczenprukk getriben habent von Aczenprukk vnd von Weinczirl durich Pirpammer Veld auf die Waid vnd wismad, daz ze Pirpavm gehort, Daz si mit der selben Chrieg vnd stO^ezze genczleich hinder vns gegangen sint baidenthalben stete ze haben vnd ze volfu^eren ‚ Swaz wir zwischen in dar vmb sprechen, Sprechen wir, daz zwischen in vnd allen den iren alle Veintschaft ab sey angeverde, vnd daz auch abseyn alle weg vnd allez Viechtreiben also, daz weder die vorgenanten von Aczenprukk noch die iren von dem heutigen tag, als der prief geben ist, chain Viech treiben sullen von Aczenprukk vnd von Weinczirl durch Pirpaumer Veld auf die Waid vnd Wismad, daz ze Pirpavm gehO^ert, noch darauf halten sollen in chainen weg, denn den nidern weg, der da get auf daz Mos in daz Haid wismad Mit der beschaiden, Ist daz daz Veld, da derselb Weg durch get, geset ist, So sulln si den selben weg nicht varen nach iren Hew, Denn, da die Weinczu^erler vnd ander ir vmbsezzen ir Hew auzfu^erent. Ist aber, daz daz selb Veld nicht geset ist. So mugen si wol den vorgenanten Weg nach iren Hew gevaren, vnd nicht anders wa. So soll dann der vorgenant Brobst von Newnburch den egenanten Hainreich vnd Vlreich von Aczenprukk darumb geben fumf vnd zwainczig phunt alter Wienner Phenning, Der er Si richten vnd weren sol auf sant Jacobstag, der nu schirist chumt, an fu^erzog, mit vrchund diczs priefs geben ze Wienn am Eritage vor Sunnwenden - Dreutzehen Hundert iar, darnach in dem Siben vnd fumfczigisten Jar.

Source Fulltext: ZEIBIG, Klosterneuburg (=FRA II/10, Wien 1857) S. 379