Ich Wysent auff dem Anger, ze den zeiten Ambtmann des edlen herren hern Rudolff otten von liechtenstain vergich - das fuer mich chom der Erber herre, her Pilgreim der Wu^erffel, ze den zeiten Chorherre vnd Obrister Chelner des Gotzhaws vnd chlagt mit vorsprechen hincz einem virtail weingarten, gelegen in dem Eysengraben vnd haisset der Ger znachst hern Petrein dem Speismaister, do man dint drithalb virtail wein ze perkrecht, vnd ein helblinge ze voitrecbt, vnd hat drew etaidinge, - vnd ist auch derselb weingarten gewesen Niclaz des kerczenmacher dem got genad, seiner rechten gelter weingart, vnd klagt als verre hincz demselben weingarten das der vorgenant Nicloz sein rechter gescholl vnd gelter wer wol vmb zwai vnd dreissigk phunt wienner phenning, die er im gelihen hiet durich trew vnd durich gu^ett in erhO^effter not pey sein lebentagen zeiten vnd hiet in auch damit geledigt vnd gelO^est von Juden vnd von Kristen, vnd pat fragen, was recht wa\er. Do wart ertailt mit vrage vnd mit recht, man scbolt Juden vnd kristen dar vmb fu^er wot tun, vnd chom ymant nechenter vnd pezzer gelter oder eribe, der mit dem egenanten hern Pilgreim icht taidinge vnd richten wolt, vmb sein vorgenants gelt, so geschech, was pilleich vnd recht wer, vnd do kom nymant zu dem selben herren, weder gelter noch eribe, das man mit Im vmb sein gelt nicht taidingen suchen wollt nach Rechten, vnd pat der erbar herre darnach fragen, was nv recht wer. Do wart Im ertailt mit frage vnd mit Recht, Seint man fuerwot darumb hiet getan Juden vnd kristen vnd erben, vnd das nv nymant nicht komen wolt zu dem egenanten herrn Pilgreim, das man mit Im taidingt vnd gericht hiet vmb sein gelt. Er scholt mir meine Recht dorumb geben, vnd das hat er getan, vnd scholt ich in, vnd wem er denselben weingarten schaffet vnd geit mit disem brieff gewaltich machen vnd an die gwer saczen - zu sampt seinen gelost iuden briefen, die er daruber hat, vnd geben Im daruber disen brieff versigilten ich vorgenanter wisent mit meinem Insigel, vnd des ist auch gezeug der erber mann mit seinem Insigel, Janns der freysinger - Der brieff ist geben - drewczehen hundert iar vnd in dem Siben vnd fumfczigisten Jar ze Svnebenten.

Source Fulltext: ZEIBIG, Klosterneuburg (=FRA II/10, Wien 1857) S. 380-381