Ich Wysennt auf dem Anger, des alten Slu^essler svn zu den zeiten Stat Richter, vnd wir mit sampt Im der geswaren Rat, di genanten vnd die ganz gemain Vnverschaidenleich ze Chlosternewnburg. Wir vergehen - das ein Chrieg vnd ein stO^ez gewesen ist zwischen vns vnd der Stat auf ainen tail, vnd zwischen dem Erwi\erdigen geistleichen herren Probst Ortolfen vnser frawn Gozhaus vnd der seinen auf dem andern tail. Von anfordrung vnd innemens wegen des Weinzehents‚ darinnen vns daucht, wie wir zu vast genot vnd beswert wurden, vnd als sich auch des probsts vnd gotshaus gesessen dienner widersaczten, vnd nicht meinten ze stewren, vnd wolten auch vns vnd der Stat in nichten beigesten vnd gehorsam sein, vnd darumb wir zu baiderseit ze Wienn vor dem Hochgeporn fursten, Herczog Ru^edolfen ze O^esterreich die zeit vnserr genedigen herschaft sein furkumen, da wir auf paiden tailn vmb die stozz vnd all ander sach, als wir gegen einander ze melden hetten vnd fu^erprachten aigenleich sein verhO^ert worden. Vnd daruber ist desselben mals von dem Lantherren vnd des fu^ersten Reten zu dem rechten ausgetragen vnd gesprochen worden, daz der vorgenant Probst Ortolf vnd all sein Nachchomen allen den Czehent, der zu dem Gotshaus gehort In dem Purchfride hie vmb die Stat gelegen, wie der darzu chomen ist, als Sy des prief habent vnd an nuz vnd gewer sind, des mag sich der vnd ein iegleicher Probst vnd all die seinigen yezund vnd hinfu^er albeg mit Vordern vnd mit Innmen treulich gehalten , als recht ist vnd von alter ist herchomen. Vnd sullen auch die sein vnd dez Gozhaus diener Welich darzu geseczt werdent, an das gerichtt selb recht vnd des ganzen vollen gewalt haben vmb dez Gozhaus Czehent ze notten, mit phenndten, mit zu spe\erren, mit aufgehalden des Wein oder Maisch, da von man den zehent schuldig wer, als Vern, daz man i\eren willen begreift. Vnd wie auch daz dieselben mugen bewaren vnd Versargen, das In also des Zehents nichts werd enzogen, noch emphu^ert von yemant, Vnd daz der dem Gotzhaus genzleich in chO^em, Vnd nicht aussen lig, des sullen Sy von vns vnd der Stat aller sach vngehindert vnd vngeirrt sein. Dann vmb all des Gozhaus dienner von der Stewr vnd des Wein vertuns wegen, als sy annders habent gehanndlt, denn wir von alter her gedacht haben, vmb das ist erfunden worden, vnd auch ausgesprochen, Das alle die, die yeczund vnd hin fu^er stetichleich des vorgenanten Gotzhaus vnd eins probsts dienner sind, was die selben weins erpawnt in den weingarten, die zu dem Gotzhaws gehO^erent vnd In herdan ze leiben oder in bestand weis verlassen sind, oder hinfu^er geben werdent vmb wein, vmb phenning, oder von gnaden vmb iren dienst, vnd auch was in anndern irn weingarten in dem Purchfride wein wirt, den si erpawnt vil oder wenig, vnd wo si denselben wein mit eins probsts gunst vnd willen auf des Gozhaus grunt vmb daz Chloster zupringent vnd niderlegent, Alsweitt dez Gozhaus freyung get, den selben wein mugen si vertun vnd anwerden mit schenkchen vnd mit verchauffen ainem hie gesessen oder ainem gast, wie In daz fu^er gevelt vnd aller fuegleich ist an alle vnser irrung, vnd sullen auch dieselben all dez Gozhaus geswaren vnd stet dienner, si sein hofgesind oder in der Stat gesessen, aller Stewr vnd mitleidens mit vns frey vnd vngenot beleiben, seind die herschaft maint vnd darumb das gesprochen hat, das Si dem Gozhaus mit Iren diensten dest willichleicher mit pezzerm vleizz vnd grO^essern trewn anhangen vnd peigesten, vnd doch mit dem egenanten probst vnd allen seinen nachchomen von dez Gozhaus wegen in gemainen Lantstewren mitleiden vnd also allain der herschaft mit einem probst vnd andern den seinen gehorsam vnd gewertig sein, Darnach als si vermugen, Welich aber purger meinent ze sein vnd dez Gotshaus Ambtlevt oder dienner sind, vnd die ir wein in der Stat awsserthalb dez Gozhaus freyung niderlegent, vnd da vertunt, die sullen auch mit der Stewr vnd aller ander sach gehorsam sein, als annder purger, wie des durfft vnd nat geschiecht. Vnd das sich all sach vnd hendel als vor geschriben stet, also haben vergangen, vnd das auch die vnwidersprochenlich gehalten werden, vnd hinfu^er beleibleich sein, des ze ewiger geda\echtnuzze vnd vester vrchund, als der obgenant Hochgeporn fu^erst, Herczog Rudolf vnd sein Rette besunder mit vns verlassen vnd geschafft habent, So geben wir egenant der Richter, der Rat vnd die ganz gemain fu^er vns, all vnser nachchomen dem vorgenanten Probst Ortolfen, seinem Gozhaus vnd allen seinen Nachchomen vnd Innhabern vnd dienern des Chlosters den brief, besigilten mit vnserr, der Stat anhangunden Insigil. Der brief ist geben - drewzehenhundert Jar, darnach in dem Newn vnd fumfczigstem Jar an sand Elspeten tag.

Source Fulltext: ZEIBIG, Klosterneuburg (=FRA II/10, Wien 1857) S. 390-392