Ich Swester Alhait von Newnburch, Chlostervrow in sande Larenzen chloster ze wienn Vergich - Das ich - mit willen vnd gunst meiner maisterschafft, der erbern Geistleichen vrown swester chunigunden der Vinianzinn zu den zeiten Priorinn vnd dez Convents gemain in sande Larenczen chloster ze wienn - mit meins Gruntherren hant, dez erbern geistleichen herren hern Maricharts dez Duringz, Chorherr ze Newnburch chlosterhalben vnd zu den zeiten Pharrer dacz der heiligen stat - verchaufft habe daz haus mit sampt der hofstat weingarten hinden dar an gelegen dacz der heiligen stat, daz weilent fridreichs des Scherdinger gewesen ist den erbern leuten Jansen dem Ringshaeutlein dacz der heiligen stat vnd vrown Elspeten, seiner hausvrowen vnd Stephan dem Chu^ettner zu den Zeiten dez obgenanten hern Maricharts Amptmann des Duringz vnd vrown annen, seiner hausvrown - vmb vier phunt beraiter wienner phenning vnd vmb zway phunt phening gelts purchrechts die si vnd alle ir nachchomen - mir - vnd meinen nachchomen furbaz alle iar davon dienen vnd raichen sullen - Vnd wande ich selber nicht aigens insigel enhabe, daruber gib ich disen prief versigilt mit meins vorgenanten Gruntherren insigil - vnd mit meiner obgenanten Priorin insigil - vnd mit meins Convents insigil - vnd mit dez erbern mans insigil Niclas in dem Perchhof dacz der heiligen stat - Der brief ist geben ze Wienn - drewczehen hundert Jar darnach in dem Sechczigisten Jar an sande Jorigen tag.

Source Fulltext: ZEIBIG, Klosterneuburg (=FRA II/10, Wien 1857) S. 394-395