Ich Michel an dem Newsidel, der alt Chuchenmaister, zu^e den zeiten Amptman des Gotshaus vnser vrawn ze Newnburch Chlosterhalben Vergich - Vmb den Weingarten, der zwey Jeuch sint gelegen ze Newnburch Vnder der Langen gazzen vnd haizzet der Everding ze nechst dem Weingarten der Troyschinkh, da man von dem egenanten Weingarten alle iar dienet dem vorgenanten Gotshaus ze Newnburch Sechs Emmer Weins ze perchrecht, vnd zwelif Wienner phenning ze Voytrecht. vnd vrown Agnesen der Wehingerinne zehen phunt Wienner phenning ze pu^erchrecht‚ die abzelosen sint, als der brief sagt, den si daruber hat, vnd nicht mer. Denselben Weingarten hat Wernhart aus dem Holtz, purger vnd Mautter ze pu^erchhawsen vor mir ürger von Passaubehabt mit vrag vnd mit vrtail, als der behabbrief saget; Darnach hat Fridreich der Steltzer, weiln purger ze pazzaw selig denselben Weingarten gelO^est von dem egenanten Wernharten aus dem Holtz, als ich seinen brief darumbe han. Vnd nach derselben zeit hat der egenant Fridreich der Steltzer bei seinen lebtagen den vorgenanten Weingarten Recht vnd redleich gegeben dem erbern manne Nichlasen dem Nu^ernberger, purger ze Ens, Daz ich den obgenanten Weingarten recht vnd redleich gelihen han vnd leich auch mit disen brief demselben Nichlasen dem Nu^ernberger vnd seinen Erben vnd allen den, den er denselben Weingarten schafft oder geit alles das, das ich In ze recht dar an leihen sol, vnd als auch mein genediger herre, der Hochgeborn fu^erst, Hertzog Rudolf ze Osterreich, ze Steyr vnd ze Kernden, Graf ze Tyrol mit mir geschafft hat, als sein brief sagt, also daz der egenant Nichlas der Nu^ernberger, sein Erben oder die, den er den vorgenanten Weingarten schafft oder geit, denselben Weingarten sulln fu^erbas ledichleich vnd vreileich haben - Vnd des ze vrku^end gib ich In disen brief versigilten mit meinem Insigil, vnd mit der erbern Lewt Insigiln, hern Christoffes dez Syrifeyer, vnd hern Hainreichs dez holfu^ezz, purger ze Wienn - Der brief ist geben - Dreutzehenhundert iar darnach in dem Drew vnd Sechtzgisten Jar an sand Johanns Abent ze Sunnebenden.

Source Fulltext: ZEIBIG, Klosterneuburg (=FRA II/10, Wien 1857) S. 406-407