Wir Rudolf von GO^ets gnaden, Hertzog ze O^esterreich, ze Steyr, ze Kernden vnd ze Krayn, Graf ze Tyrol etc. bechennen vnd Tun kunt offenlich mit disem brief Vmb die vi\erzehen Hundert phunt Wienner phenning, die vnser getrewn, di purger von Newnburch Klosterhalben Steuzzen, vnserm Juden von Wienn gelten solten, vnd darumb si vnser liber herr vnd Vater selig Hertzog Albrecht hintz demselben Juden versatzt hat, Also, daz si im ierlichen von vnser Purgerstewr daselbs geben solten fumf hundert phunt phenning als lang v\entzt Si in der egenanten Vierczehen Hundert phunt phenning gentzlich berichten vnd gewerten nach Sag ii\er brief, die er darumb von in het, Daz wi\er wellen, Ist daz derselb brief, den si dem egenanten Juden darumb geben habent, vnd der verloren sol sein, als wir vernomen haben, fu^erchem von y\emant, wer der wêr, daz der tod vnd ab sey, vnd fu^erbas chain chraft hab in dhainen weg noch den egenanten Purgern ze dhainen schaden komen, Seid der egenant Jud der vorgenanten Virtzehen Hundert phunt phenning gantz vnd gar gewert ist. Mit Vrkund ditz briefs. Geben ze Wyenn an Gotsleichnamstag - Drewtzehen Hundert Jar darnach in dem vier vnd Sechtzigisten Jar. † hoc est Verum † Wehinger.

Source Fulltext: ZEIBIG, Klosterneuburg (=FRA II/10, Wien 1857) S. 409-410