Ich Chunrat der Ramung, ze den zeiten korherre vnd kellner vnser frawn gotshaus datz Newnburgk vergich - Das fur cham, do ich an dem Rechten sazz, der beschaiden knecht Simon der hepffer vnd klagt mit vorsprechen gegen zwain weingarten, der ain gelegen datz kallnperig dez ain drittail ist, vnd haisset der Schapeller, vnd leit ze nachst Otten des Tuczen weingarten, do man alle iar von dient Sechczehn Stauff weins ze pergkrecht, vnd ein phenning ze voitrecht, Dez andern, des ain Rahen ist, vnd leit an dem kallnperig zenachst des pharrer weingarten von kallenperig, vnd haisset das freitegl, do man alle iar von dient ain virtail weins ze Perkrecht vnd ain helbling ze voitrecht dem vorgenanten Gotshaws, vnd klagt gegen den egenanten zwain weingarten seins rechten gelters gut vmb zwai vnd dreizzigk phunt wienner phenning, als der geschefftbrief sagt, den sein pesol, Dietmars des lO^effler witib hinder ir lassen hat, vnd vmb acht phunt phenning, die er im auch gelten sol, vnd pat gerichts, do geviel das mit frag vnd mit recht, ich solt ein furbot lassen werden, ob man die zwen obgenanten weingarten ymant verantwurten wolten, vnd geschech darnach, was recht wer. Do lie ich fu^erbot werden ze hauss vnd ze hoff, als ich ze recht solt, vnd wart auch das fu^erbot bebert vor mir ze rechter zeit, als recht ist, nach derselben zeit kam Vlreich der Manseber vnd Elspet sein hausfraw fu^er mich vnd stunden dem egenanten Simon dem hepffler vor offem gericht an langen. Do pat Simon der hephler vorsprech fragen, was nv recht wer, Do wart ertailt von dem erbern geding, seit das fu^erbot ze rechter zeit bewert wer, vnd im auch der obgenant Vlreich der Manseber vnd Elspet sein hausfraw vmb das vorgenant geltes an langen stunden, Ich solt in der obgenanten zwain weingarten gewaltich machen vnd an die gewer seczen - vnd solt auch mir dar vmb mein recht geben, Daz hat er getan. Mit vrkund ditz brieff versigilt mit mein Insigel, So han ich auch gepeten den Erbern mann Petrein den Manseber in der weitengassen das er auch der sach zeug sey mit seim Insigel, wann er dez tag es Geding gewesen ist. Der brief ist geben - drewzehen hundert iar, darnach in dem Sechs vnd sechczigisten iar an Sand Mathyas Abendt.

Source Fulltext: ZEIBIG, Klosterneuburg (=FRA II/10, Wien 1857) S. 416-417