Ich fridreich der Zistell, die zeit Sluezzla\er vnd auch Juden Richter ze Newnburgk klosterhalben vnd auch die zeit Ambtmann daselbs des Edeln herren hern Eberharts von Chappeln vergich - das fu^er mich chO^em, do ich an dem rechten saz‚ der Erber Chorherre her Ortolf von wienne, dy zeit Oblaymaister des gotshaws vnser frawen zu Neunburgk, vnd klagt do mit vorsprechen vnd auch mit vrkund briefen an der Oblay stat hincz ainen weingarten, des ain halbs Jeuch ist, vnd der weylent hainreichs des waldner gewesen ist vnd der do leit an dem puchperig zenacbst Irnfrides weingarten von Mutzesperig, dem got genad, vnd do man von alle iar dient dem egenanten herren hern Eberharten von Chappeln fumf viertail weins ze perkrecht vnd drey wienner phenning ze voitrecht - vnd klagt darauf vmb ain phunt wienner phenning geltes versezzens purkrechts, als sein brief sagt, vnd meldet auch seinew zwispild, vnd pat darumb gerichts vnd fragen, was recht war. Do fragt ich vmb, do ward ertailt, man solt ein fu^erbot lassen werden, ob den weingarten ymant wolt verantworten, vnd gescha\ech darnach, was recht wa\er. Das fu^erbot ward gesagt ze rechter zeit, vnd ward auch vor offem gericht bewert, vnd nach dem selben fu^erbot kam nymant fu^er Recht den egenanten weingarten wolt verantwurten. Do klagt der egenant herr Ortolf der Oblaymayster hincz demselben weingarten vmb das versezzen purkrecht all sein tag vollichleich vnd rechtleich vnd meldet auch als oft seinew zwispild, vnd licz auch als oft furbot darumb werden als oft vnd als verre, vncz das Im mit frag vnd mit recht ertailt ward, Ich solt Im potten darauf geben zwen Erber mann, die den egenanten weingarten schauten vnd scha\eczten, ob der weingarten icht tewrer wa\er, denne das versessen purkrecht vnd die zwispild, die mit recht darauf ertailt vnd gegangen sind, vnd gescha\ech darnach, was recht wa\er. Nach derselben zeit chomen die selben zwen Erber mann wider fu^er mich, do ich an dem rechten saz, vnd sagten do pey irn trewn, als Si pest chunden vnd mochten, vnd als si ze recht solten‚ das si den egenanten weingarten geschawt vnd gescha\ezt hieten, vnd das er so tewr nicht wer, als das versessen purkrecht - Do pat der egenant herr Ortolf - aber fragen ‚ was recht we\er. Do fragt ich vmb, do ward ertailt vnd mit recht vnd mit vrtail vervoligt von mann zu mann, Seind sich die klag als lanng vnd verr vergangen hiet, vnd als oft fu^erbot darumb gesagt wer, vnd nymant auf antwurt chomen wer, vnd auch die Erbern lewt Ir chuntschafft darumb gesagt hieten, das der weingarten so tewr nicht wer, als das versessen purkrecht etc. - ich solt die gewer desselben weingarten Inne haben virczehen tag, vnd solt auch ich den erben des weingarten das ze wissen tun, vnd die gewer anpieten, ob ymant chO^em in der zeit, der sich mit dem egenanten herrn Ortolfen verrichtet vnd in vnchlaghafft machet, vnd geschech darnach was recht wer, ChO^em aber nymant in der zeit, der sich mit dem richtet, So vorgeschriben stet, so solt derselb herre Ortolf der Oblaymaister behabt haben vnd solt ich in des vorgenanten weingarten genczlich gewaltig machen - vnd solt er auch mir darumb mein recht geben vnd solt auch ich In des vorgenanten rechten ainen behabbrief geben. Das geviel auch mit frag vnd mit recht, vnd das hab auch getan Mit vrkund des brieffs, versigelt mit mein - Insigel - Des ist auch gezeug mit seinem Insigel der Erber mann Niclas von Mutzesperg der des tages geding gewesen ist - Der brief ist geben - dreuczehen hundert iar‚ Dar nach in dem Ains vnd Sybenczigistem Jar des||
Mittichenn vor pfingsten.

Source Fulltext: ZEIBIG, Klosterneuburg (=FRA II/10, Wien 1857) S. 437-439