Johannes de Reynbach, Canonicus ecclesie beate Marie veteris capelle Ratisponensis, Collector Censuum et aliorum debitorum camere apostolice per provinciam Salisburgensem a Reverendo in Christo patre et domino domino Johanne, Dei gracia Episcopo Augustensi apostolice sedis nuncio auctoritate apostolica deputatus. Notum facimus vniversis, quod a honorabili viro Arnoldo dicto Spiczer, cive Ratisponensi recepimus XLIII florenos auri boni ponderis, nobis per ipsum Arnoldum numeratos et presentatos ex parte Venerabilium dominorum Cholomanni prepositi et Conventus Monasterii Newnburg. Ord. Reg. Canon, s. August, patav. dioc. racione mediorum fructuum parochialis ecclesie in Kornnewnburch patav. dioc. taxatorum de mandato Reverendi in christo patris, Domini Alberti Episcopi Pataviensis per venerabilem et prudentem virum dominum Jacobum Decanum et plebanum in Asparn dicte Patav. dioc. ad XLVIII florenos, de quibus dicti domini, prepositus et Conventus asserunt venerabilem virum dominum Cunonem, Plebanum dicte ecclesie in Chornnewnburch V florenos in Romana curia persolvisse. Idcirco dictos dominos, prepositum et Conventum Mon. in Newnburch et prefatam ecclesiam in Chornnewnburch a prefatis XLIII florenis sic solutis et nobis numeratis auctoritate apostolica nobis in hac parte commissa absolvimus, quitamus et liberamus harum testimonio litterarum. Datum Ratispone sub sigillo nostro presentibus appenso, Anno Domini Millesimo CCC° LXX° secundo, Indiccione X, die vero vicesima secunda Mensis Septembris Pontificatus sanctissimi in Christo patris et domini domini Gregorii divina providencia pape vndecimi Anno Secundo.

Source Fulltext: ZEIBIG, Klosterneuburg (=FRA II/10, Wien 1857) S. 448-449