Ich Hainreich der Herwerger, die zeit Richter datz Heroltzdorf vnd ich Elspet sein hausfraw - wir veriehen - daz wir vns mit vnsern trewn an aydes stat vnd an alles gever verpunden haben hintz dem erbern herren, hern petrein dem lenhofer, ze den zeiten Chorherre vnd ober Chelner des Gotzhaus ze Neunburch vmb den hof vnd weingarten vnd Ekcher vnd ain wisen ze heroltzdorf, die wir Trautmann von dem Gobels gesaczt haben, als der satzbrief sagt, den vns der obgenant her Peter der Lenhofer versigelt hat, daz wir denselben vnsern hof vnd alles daz wir im vmb sibentzk phunt darzu versatzt haben, vnverzogenleich inner vier iaren ledigen schullen von dem obgenanten Trautman von dem Gobels an alles vercziehen. Tet wir dez nicht, so schol der egenant her Petrein oder swer die zeit Chelner ist, recht vnd vreye wal haben, mit vnserm guten willen, den oft genanten hof vnd was wir versatzt haben, ze verchauffen vnd geben, wem er will, als verr daz es von dem Trautmann ledig wiert. Mit vrchvnd dez briefs - versigilt mit meinem insigel vnd - mit Jacob pernharts insigel - Der brief ist geben dreutzehn hundert iar‚ darnach in dem fumf vnd sybentzgisten iar an sant Johanns tag ze Sunnbenten.

Source Fulltext: ZEIBIG, Klosterneuburg (=FRA II/10, Wien 1857) S. 462