Reverendis in christo patribus, dominis et confratribus suis karissimis dominis. Cholomanno Venerabili preposito. Bartholomeo Decano. totique Capitulo Ecclesie Newnburgensis Ord. s. Aug. Pat. dioc. Fridricus dei permissione prepositus, Vlricus decanus totusque Conventus Mon. Walthusen. eiusdem ordinis et dyocesis. Cum devotis oracionibus sinceram et fraternam in domino caritatem. Cum religiosorum ecclesie federe singularis dileccionis adunate. vigili cura semper ad hoc intendere debeant. ut qui nexu carnalis amoris hic fideliter coniunguntur, solutis et corporibus in spiritu feliciter congregentur. Ad quod utique fiendum. nichil adeo credimus profuturum, quam ut fusis pro invicem piis obsecracionibus placabilem sibi reddant supernum iudicem, qui in ira misericordie recordatur. Si enim secundum statum exterioris hominis, qui sibimet quodammodo preparare potest adminiculum in caritate iubemur documentis apostolicis alterutrius onera supportare, videtur oportunius et multo saluti congruencius, vt interior homo noster, qui disiunctus a corpore nichil sibi prodesse poterit. bonorum operum exerciciis et caritatis oracionum suffragiis adiuvetur. Nos igitur iuxta salubrem desiderii vestri conceptum ad unionem nostre confraternitatis gratanter vos recipientes decrevimus vobis omnibus et singulis cunctisque vestris successoribus tam in vita quam in morte plenum dare participium omnium piarum accionum, que per nos in ecclesia nostra ex nunc in antea operate fuerint, elemencia nostri salvatoris. Adiicientes nichilominus, vt cum aliquis Canonicorum vestrorum vocante domino decesserit, eiusdem nobis obitu nunciato comendabimus ipsius animam conswetis vigiliis et missarum sollempniis fidelium redemptori. In cuius rei evidens testimonium vobis has nostras literas damus nostrorum sigillorum munimine roboratas. Datum XIII Kalend. Novembris Anno dni Millesimo Tricentesimo Septuagesimo Quinto.

Source Fulltext: ZEIBIG, Klosterneuburg (=FRA II/10, Wien 1857) S. 463-464