Wir Albrecht von gotes gnaden Herczog ze Osterreich, ze Steyr, ze Kernden vnd ze Krain, Graf ze Tyrol etc. Tun kund vmb den graben gelegen pey Rust auf dem obernmos, den die lewt gemainleich auff dem Tulner veld gemachet vnd auff gewarffen habent mit vnserer gunst vnd guettem willen, das wir chundleich vnd aigenleich bebeyset sein von Erbern lewten, das der selb graben der ganczen lantschaft nucz und guet ist, vnd da von bestetten wir in mit disem vnserm brief in aller der mazze, als er aufgewarffen vnd mit stainen geraint ist, vnd wellen gar ernstleich, das er fuerbaz also beleibe ewikchleich, vnd das auch allermenigkleich, er sey edl oder vnedl, reich oder arme, der desselben graben geniezzen wil, Dar zu geholfen sey mit graben oder mit welicherlay sache das sey, wo des derselbe graben nottduerftig ist, were auch, das man von vorgenanten grabens wegen yman seiner Akcher oder wisen ichts abgegraben hette, dem das noch nicht vergolten were, Mainen wir vnd wellen gar ernstlich, Daz dem das dy gancze gemain nach gelte In aller der mazze, als man das andern lewten vor mals gegolten hat. Mit vrkund dicz brieffs. Geben ze Wienn an freytag vor Sand kathrein tag - drewczehen hundert Jar, darnach in dem Sechs und Sybenczigistem Jare.

Source Fulltext: ZEIBIG, Klosterneuburg (=FRA II/10, Wien 1857) S. 471