Ich Ott, der Tu^ecz waltchuens svn Vergich - Daz ich - mit meins perchherren hant, dez erbern Chorherren hern Petreins ze den zeiten Obrister Chelna\er des gotshaus vnser vrowen, - vnd mit meins Amptmanns hant, des erbern manns Thomans, hern Symons svn, zu den zeiten Amptmann des Gotshaus vnser vrowen- geben hab die gu^eter, die hernach geschriben stent. Von erst mein weingarten, daz drew virtail sint, haist der schappeller, vnd leit ze Chalnperig ob sand Nyclas weingarten ze nachst dem goltstainer, vnd do man alle iar von dient auf die obern Chamer ze dem Gotshaus vnser vrowen anderthalben emmer weins, vnd drey wienner phennige ze perchrecht - Vnd dornoch mein haus, gelegen auf dem Anger, zenachst dem wisent, vnd zenachst der Chislinggazzen, vnd do man alle iar von dient ze dem Gotshaus vnser vrowen in daz Chelnampt zwen vnd dreizzichk wiener phennige zu Gruntrecht - dem Erbern Probst Cholman vnd dem Convent gemain - vmb zwo herrenphruendt, die sew mier, vnd swem ich dew schaff oder gib nuer ze main ains lebtagen, ich sei in der landez oder auzzer landez, Raichen vnd geben schullen alle Jar vier vnd sechczichk metzen gutz waitz, vnd schullen mier die geantburten in mein haus an alle mein mv, vnd zwen vnd Dreizzichk Emmer weins auz dem weingarten dem Chrächsner, vnd zwen vnd dreizzichk Emmer weins auz dem weingarten dem Poppen mit der stat ham, allez pey ir Presse auf der Obern Chamer. Waer aber, daz ain pyseczz cha\em, dez got nicht engeb, daz so vil weins in den zwain weingarten nicht enwu^erd, sv schullen sew mier daz erstatten vnd geben aus andern iren weingarten, die alz gut sein, alz die vorgenanten zwen weingarten - vnd schullen mier geben Summergwant vnd wintergwant, und phruentphennige, als man andern Chorherren geit. Vnd ist, daz ich die phruent fumf iar innim, daz ich so lang leb, so schvl ich dem Probst vnd dem Convent zwainczichk phunt wienner phennige ze Peszzerunge hincz zu geben - Dor vber - gib ich in den brief, versigilt mit dez egenanten perchherrn Insigil, dez erbern Chorherrn hern Petreins, ze den zeiten Obrister Chelner des Gotshaus vnser vrowen, vnd mit dez egenanten Amptmanns Insigil Thomans, herrn Symons svn. Dez ist auch geczeug mit seinem Insigil der Erber mann Wysent auf dem Anger, dez alten Slu^ezzler svn, der erber mann mit seim Insigil Peter der mannseber, der erber mann mit seim Insigel Chunrat der grassmogler, der Erber mann mit seim Insigel Vlreich der alt Spitalmeister - Der brief ist geben - Dreutzehenhundert Jar dornach in dem siben vnd sibentzigistem Jar acht tag vor weinachten.

Source Fulltext: ZEIBIG, Klosterneuburg (=FRA II/10, Wien 1857) S. 474-475