Wir Albrecht von gots gnaden. Hertzog ze Osterreich, ze Steyr, ze kernden vnd ze krayn, Graf ze Tyrol etc. Embiten den erbern geistlichen vnsern getrewn andechtigen, den korherren gemainlich des Gotshauses ze Nevmburg vnser gnad vnd alles gut. Wir lazzen||
euch wizzen, daz die erbern, geistlichen vnser getrewn andechtigen N. die Priorinn vnd der Convent der klosterfrawen gemainlich ze Tulln vmb daz wir In vnd Irem Gotshous, die Aigenschaft ains zehenden ze Ru^ekerstorf der von vns ze lehen gewesen ist, verschriben haben, vns einen brif habent gegeben den wir in vnserer gewalt mainen vnd geschoft haben zu behalten in solicher laut, als hienach geschriben stet: Wir Swester Clara, Priorinn vnd der Convent gemainlichen des Gotshovs ze Tulln prediger ordens Bekennen - Wann der Durchleuchtig fu^erst vnser lieber genediger herre hertzog Albrecht von Osterreich zu dem Chauf, den wir getan haben von den edlen herren - - Merten vnd Hans den Stuchsen vmb dezehenden gelegen ze Ru^ekerstorf, des Achczehen Lehen sind vnd den dieselben Stuchsen von dem egenanten vnserm genedigen herren dem Hertzogen ze lehen habent gehabt, Seinen willen vnd gunst gegeben vnd auch darzu von fu^erstlicher miltikait vns vnd vnserm Gotshous ewiklich di aigenschaft desselben zehenden geben vnd verschriben hat, mit seinem brief, den er vns daruber hat gegeben, haben wir fu^er vns vnd vnser nachchomen ewikleichen gegen demselben unserm genedigen herren Hertzog Albrechten vns verpunden vnd verpinden auch wizzentlichen mit disem prif, daz wir im fu^erbaz, die weil derselbe vnser herre lebet, Im alle iar auf den nesten Mentag vor sand Merten Tag ain Ampt vmb geluk vnd Selde der lebendigen gelaubigen singen sullen vnd wellen, vnd nach seinem tode ierikleichen den abend seiner schaidung mit Vigilien vnd den tag mit einem Selampte ewikleich begen an allen vnderlazz vnd savmung, welhes iares aber das nu furbaz von vns vnderlazzen vnd nicht also begangen wurde, als da vor geschriben stet, so sullen vnd mugen desselben iares die erbern vnd geistlichen in got, die korherren zu Newmburg die nutze des vorgenanten zehenden gentzileich vessen innemen vnd niezzen an alle vnser irrung vnd Widerrede vngeverlich, vnd daruber zu vrchunde geben wir - disen brief versigelten mit meinem, der obgenanten piorinn vnd mit vnserm des Convents anhangunden Insigeln. Geben ze Wienn an sand kathreinen tag - Dreutzehen hundert Jar vnd darnach in dem acht vnd sibenczigisten Jar. Davon enphelhen wir mit disem brief fur vns vnd vnser erben vnd Nachchomen euch vnd allen ewrn nachchomen ewiklich daz ir nu furbaz vmb die obgeschriben vnser gedechtnusse stets ewr kuntschaft habt, vnd were daz derselb gotsdienst dhains Jars verlazzen wurde, daz ir denn nach der Pene, die darauff geseczt ist, vestiklich greiffet nach ditz vnsers vnd auch der vorgenanten klosterfrawen briefen sag, als oben geschriben stet, wann wir das ernstlich mainen. Mit vrkund ditz briefs Geben ze Wienn an sand Andres tag - Dreutzehen hundert Jar vnd darnach in dem Acht vnd Sibentzigisten Jar.

Source Fulltext: ZEIBIG, Klosterneuburg (=FRA II/10, Wien 1857) S. 475-477