Nos Cholomannus dei dignacione prepositus, Bartholomeus decanus, totusque Conventus Canonicorum reg. Ord. s. Aug. Neunburge Patav. Dyoc. notum facimus presencium inspectoribus vniversis, quod nos considerantes, quanta veneracione omnes pie mentes laudibus virginis matris genitricis dei regineque celi semper invigilent, et pro eisdem augendis omne studium dileccionis impendant, scientes nimirum, quod neque vox, neque sensus mortalium, quamvis totis elaborent affectibus, quidquam laudis edere depromereque sufficiant, quo vel minimam tante virginis valeant includere dignitatem, quam credunt ymnis angelicis pro eternitatis longitudine sine spaciis iugiter collaudari, nec tamen in tam benedicta a domino laudis umquam deesse materiam, quam omnis creata virtus et pulchritudo super se miratur incomprehensibiliter exaltatam, attendentesque quod amplius pre ceteris in eiusdem regine celestis confitenda magnitudine multiplicandisque laudum eius preconiis debeamus existere, cuius nobis diurnis nocturnisque successionibus consolacionem adesse sentimus, et que, quamquam celi mundique sit generalis Imperatrix omniumque matrona fidelium, ipsa tamen Monasterium nostrum quasi singulariter electum habitaculum dignata est hospitalitatis et specialis patrocinii presencia virtuosique nominis tytulo decorare, sub cuius presidio pace perfruimur ac tutela, pro eiusdem semper virginis laudibus adaugendis obligamus nos omnes et singuli perpetue promittentes cum presentibus literis pro nobis et omnibus successoribus nostris, nos singulis secundis, quartis, sextis et septimis feriis omnibusque festivitatibus anni in Monasterio nostro predicto in choro post completoriam sinaxim decantaturos per notam et sollempniter antiphonam de eadem beata Maria semper virgine que incipit: Speciosa facta es et suavis etc. submisso versu et collecta de eadem beata virgine subiunctisque versu et collecta pro peccatis, que antiphona nostro Monasterio dotata est per duodecim solidos denariorum wiennensium certorum reddituum, qui Gruntdienst vulgo dicuntur, et annuatim ad nostram debent porrigi oblayam, prout in litera empcionis de hoc plenius continetur. Si vero predicta antiphona per nos, ut premissum est, per mensem integrum decantata non fuerit, tunc redditus eiusdem anni dari debent pauperibus ad Civium hospitale. In cuius obligacionis et promissionis testimonium duximus presentem literam sigilli Oblaye nostre munimine ‚ sub quo nos omnes et singuli pro nobis et successoribus nostris nos astringimus, roborari. Datum VIII die Decembris anno Domini millesimo trecentesimo octuagesimo.

Source Fulltext: ZEIBIG, Klosterneuburg (=FRA II/28, Wien 1868) S. 10-11