Ich Bartholome Techant vnd wir der gantz Convent gemain dez Goczhaws vnser vrawn zu Newnburch Chlosterhalben vergechen fur vns, vnd fur alle vnser nachchomen - Daz der Erbirdig vnser genadiger herr Probst Cholman dez egenanten vnser vrawn gotzhaws in vnser Siechampt geben vnd gemacht hat Ainlif phunt wienner phenning gelts purchrechtes - Dar vmb verpinten wir vns vnd all vnser nachchomen mit vnsern vesten trewn an vnsers Gotzhaws stat, daz ain ygleicher Siechmaister vnsers egenanten Siechamptz ewigchleich pegen sol die Oktaff Gotzleichnam all iar am nachsten suntag nach Gotzleichnamtag mit der Vesper vnd mit der process vnd mit dem Ampt, vnd sol zu den process all iar machen vier wandel churzen, die ir yglichew drew phunt wachs sol haben di man mit Gotsleichnam sol tragen., vnd sol haben zwen vidler dez selben tags var gotzleichnam, vnd sol ydem vidler geben Sechczig phenning, auch sol vnser Siechmaister all Jar wer guster ist vnsers gotzhaws Sechs schilling wienner phenning an Gotzleichnamtag fur sein mue, die er hat dezselben tags vnd sol geben den Messnern vnsers Gotzhaus all Jar an dem tag Sechczig phenning auch fu^er ir mue. Auch sol vnser Siechmaister dezselben tags geben vnserm herrn pharrer von sand Merten, vnd dem pharrer von Newnburg marchthalben vnd dem pharrer von der Heiligen stat vnd allen iren gesellen vnd auch allen andern priestern , wer die sind, di des Tags in der Process sein ain mal dez Tags, aber die vier herrn, di daz Sacrament tragen dez tags ‚ di sullen dez margens vnd des Abentz mit vnserm Siechmaister essen, vnd waz der egenanten ainlif phunt gelts purchrechtes vber peleibt vber als daz vor geschriben stet, daz sol vnserm Siechhaws peleiben on all wider red. Vnd dez zu ein offen vrchund - geben wir - vnserm egenanten herrn Probst Cholman den prief versigelt mit vnsers Conventz anhangunden Insigel. Der geben ist - drewtzehen hundert iar, darnach im ains vnd Newnczigstem Jar acht tag vor sand Johannes tag ze Sunbenten.

Source Fulltext: ZEIBIG, Klosterneuburg (=FRA II/28, Wien 1868) S. 63